E hautū ana a Pōrangahau i tētahi tauwhāinga hahau pōro motuhake

Aroha Treacher
  • Te Tai Hauāuru

Kua whakaohoohotia te papa kāinga pakupaku nei o Pōrangahau i te tonga o Te Matau ā Māui, e te tauwhāinga hahau pōro mā runga hoiho ki tātahi, ko tōna kotahi i te motu whānui. E hia nei ngā rau tāngata o te rohe, o te ao anō hoki i whakarauika atu ki te mātakitaki i tēnei rerenga hōu o te hākinakina nei.

E whitu kiromita te roa o te tātahi nei o Te Paerahi i Pōrangahau, inā te rerehua o te waahi nei, hei hautū i te tōnamana whakahirahira nei.

He hākinakina hōu tēnei kua tau mai ki Aotearoa, ahakoa kei te ōrite ngā ture o te kēmu nei ki te kēmu tūturu, ko ngā rerekētanga, he pōro kōmāmā ka whakamahia, kia ngawari ai te tākaro i te onepū.

Koia nei te tau tuarua i tū ai tēnei tauwhāinga, nā te arohanui o ngā whānau nō konei me te hapori whānui ki ngā hoiho me te keemu nei. Heoi, ehara i te mea ko te hau kainga anahe e whai waahi mai ana.

Kei te whakahaerehia e rātou ngā keemu mā ngā reanga katoa mai i ngā mea tauhou tae noa atu ki ngā tautohito. E tumanako ana ngā kaiwhakahaere, ka haere tonu tēnei tauwhainga, ā, haere ake nei, haere ake nei.