E eke tonu ana a Campbell

Kei te māro tonu te haere o te toki hahaupōro o Ngāti Ruanui, a Michael Campbell. Kua eke ia ki te turanga 11, i te mutunga o te rauna tuatahi o te whakataetae Qatar i Doha.

E rima āna hahau iho tahi, kotahi hoki te hahau ake tahi, kia whā āna hahau i raro iho i tā te kāri i tohu ai, ā, kia toru ngā hahau ki muri i te kai-ārahi o te wā, a Ricardo Santos nō Portugal.

Kua tutuki hoki i te uri Māori nei, he whā tekau mā toru tau te pakeke, tā te kāri i tohu ai, i ngā rauna e iwa kua hipa, i ngā whakataetae haupōro o Ūropi.

Ko te tūranga tekau mā whitu tā te toa o mua o te whakataetae US Open i oti ai, i te whakataetae matua tuatahi o te tau, arā, i te whakataetae o Abu Dhabi i tērā wiki, kia riro i a ia te tata ki te $41,000.