E aro whakamua ana ngā Blues

James Perry

E rua ngā kēmu e toe ana mō te kapa Blues i te whakataetae Super Rugby tau rua mano mā waru, kua timata rātou ki te aro ki ngā tau e heke mai nei. 

Kua mahue anō ngā whiringa toa i ngā Blues, hēoi kei te hiahia rātou kia wikitōria i ngā kēmu e rua nei. Hei tā te pouwhitiki, hei tā Matiaha Martin, "mā te wini i ēnei kēmu ka puta te ihi, te wehi i roto i ā mātou."

Nō te Pōmere nei i hinga i ā rātou ngā Reds o Queensland, te wikitōria tuatahi o te tau ki te kāinga. Ka mutu, he āhuatanga hou mō te uri nei o Waikato mō Matiaha Martin. Nō te Haratua ia kōkohu ai ki te kapa Blues, hēoi, "koina te wā tuatahi i waiata tahi au i te waiata o te kapa nei." Hei tāna anō, he wairua hihiko i ūmere mai i te kapa.

Koira hoki te kēmu whakamutunga o te ika ā whiro, o Jerome Kaino i Te Anawai. I whakamānawa te kapa Blues i a mā te haka. Hei tā Martin, ko Kaino tētahi tino rangatira o te karapu, "kei tikitiki ō rangi kē ia, ko mātou ngā taiohi e ngana ana ki te eke ki tōna taumata."

nā Whiria Meltzer me Ruka Makiha te haka i tito mō te tukinga o ngā Blues ki ngā Raiona i tērā tau. Hei tā Martin, "he haka tino pai tēnei mō te kapa, mo te hāpori hoki o te kapa kikorangi," nā kua whakamahia e te karapu hei whakamānawa i ā rātou anō.

Ehara i te mea he māmā ngā kēmu whakamutunga o ngā Blues, ko ngā Hurricanes i Pōneke te hoariri i tēnei Rāhoroi, ko ngā Crusaders hei te wiki ka whai ake.

Ahakoa ka kore ngā Blues e eke ki ngā whiringa whānui, ka āhei tonu rātou ki te whakararu i ngā tūranga whakamutunga o kapa kē atu. Mā te aha i tēnā whakarite ai he tūāpapa mō te tau hou.