E anga ana a Whaanga ki te whiringa tēnehi toa o te whakataetae Waikato-Bays

Rahia Timutimu
  • Waikato/Te Waiariki
  • Te Whanganui-ā-Tara

Ki te tēnehi ki te whakataetae kei raro ngā pakeke i te tekau mā waru tau o Waikato i tū ki Kirikiriroa, ko te hiahia o te toa ō-mua o te reanga kei raro ngā pakeke i te tekau mā ono tau a Zachary Whaanga, kia wikitōria i tēnei taitara i a ia e aru ana kia whai tūranga ki ngā whiringa toa ka tū hei tēnei Rāhoroi.  I tūtaki a Te Kāea ki te uri o Ngāti Kahungungu, me te whākī mai i āna whāinga mō ngā tau kei te heke.

Mō ngā tau maha, kua eke a Zac Whaanga ki ngā taumata hiranga o ngā whakataetae tēnehi ki Aotearoa, ki tarawāhi hoki.

"He hiahia nōku ki te wikitōria i ngā wā katoa, kāre he pai ki au te hinga", te kii a Whaanga.

Ā, i tēnei wiki e hiahia ana ia ki te kapo i te taitara matua i te whakataetae kei raro ngā pakeke i te tekau mā waru tau o Waikato-Bays.

Kei Te Whanganui a Tara te uri o Ngāti Kahungungu e noho ana, ā, i haere tahi a ia me tana kaiako ki Kirikiriroa.  Hei tāna, ki te kore e tino awhi ōna mātua, kua kore ia e eke ki ngā taumata i ēnei rā.

"Kua roa ōku mātua e kaha tautoko ana i au, he nui hoki te pūtea kua whakapau i runga i aku mahi tēnehi. He kotahi haora te roa mai taku kainga ki taku wāhi whakangungu, ka mutu, ko raua tēra e kawea ana i au i ngā wā katoa," ki tā Whaanga whakamārama.

Kua haerere haere a Zach i te ao me te tākaro tēnehi.  Hei tāna he maha ngā hua ka puta mai i te tākaro atu ki ngā kaitākaro i tarāwāhi.

I puta mai ngā hua i tana tukinga tuarua o te whakataetae, ngāwari noa māna te wikitōria i tana tukinga i roto i te kotahi haora.

Hei tēnei Rāhoroi tū ai ngā whiringa toa.