Kaupapa: Rugby

Baywide rugby returns to Matakana Island

James Perry
  • Waikato/Te Waiariki

Nō te hūnukutanga atu o te tukinga o Te Puna ki Whakarewarewa i auraki atu te whakataetae whutupōro Baywide o te Waiariki ki te moutere o Matakana. He rā whakanui i ngā hononga o ngā karapu ki te moutere. Anei a James Perry

Mai iho, mai iho ngā here whutupōro o Te Puna me te moutere o Matakana, ā mohoa nei.

Hei tā Tame Kuka, kaumātua ō Te Puna, "mai rā anō rātou i haere mai ki Te Puna ki te āwhina mai i a mātou. na reira, ka hoki mai ki konei ki te hoki mai he pūtea mō tō rātou nei karapu. Ki te whakatāunga anō kei wareware pea wēnā hononga."

He hokinga ki tāna ake pāharakeke te mea miharo mō te kāpene o Te Puna, mō Te Aihe Toma. Ka mutu, he nui ngā kaitakaro mō Te Puna i tipu ake i Matakana i roto i ngā tau. 

He pērā hoki ki Whakarewarewa. Tokohia ō rātou kaitakaro mai rā anō, nō tēnei rangi tonu he uri whakaheke nō ngā tīpuna nō Matakana. Nā whai anō i whakaae rātou ki tā Te Puna i hiahia ai. 

"Ka tono atu a Te Puna, Tauranga Moana ki a mātou, ka tae mai. Ka tae mai ki te whakanui i tēnei rā whakahirahira." te kōrero ā John Tapiata, kaumātua o Whakarewarewa.

Hei tā Jesse Mason-Grant, kāpene o Whakarewarewa, kāore pea i kō atu i tēnei, te haere a te ūniana o Te Waiariki ki ngā hāpori moroiti nei.

Me uaua ka kite i ngā kapa e tae ana ki ngā kēmu mā runga tarikihana hēoi i pērā ngā kapa itainahi nei. Ka mutu, māhea e tae atu ki te whīra, he pakanga tonu te haere ake.

Tekau mā rua noa ngā piro te huatango o ngā tatauranga i te weherua. He kakari nui. 

Hēoi, i te wehenga tuarua, i whakaatu e Te Puna na te aha rātou e noho whata nei i te whakataetae Baywide.

Ko te tatauranga whakamutunga ko te 46-14.

Ka whakaae atu ngā kāpene e rua, he kēmu o ngā haurua e rua. Hēoi, nō te pakari o Te Puna rātou i angitu ai. 

Hei tā Toma, he mōhio nō rātou mēnā ka tatari noa, kāore e roa ka pau te hau o Whakarewarewa, kātahi ka pakaru te rarangi ārai.

E kī ana te kōrero, ko te whutupōro te tino toa o te rā, hēoi ka mātua pea i ēnei kōrero ā Tapiata, "ko te manaakitanga o Matakana, Tauranga Moana ki ā mātou, he whakakahanga o tērā tūāhuatanga o te aroha tētahi ki tētahi."