Baseball Dreams get Closer

No nanahi nei timata ai te whakataetae poipapa ā motu mō ngā tamatāne raro i te tekau mā iwa tau te pakeke ki Tāmaki Makaurau. Engari ko ngā pae tawhiti tonu kei te pae ō whakaaro.

I puta te kōrero i ngā rangi tata ka whai wāhi atu tētahi tīma poipapa ō Aotearoa ki te Australian Baseball League hei te mutunga o te tau nei.

Hei tā Tukuteihu Repia, kaitakaro mō te kapa Howick Pakuranga Hawks, he timatanga tēnei mōna e kite ai ōna moemoea. Ko tāna tino whāinga ki uru atu ki te whakataetae matua i Amerika, arā te MLB.

Hei tā Riki Paewai o Poipapa Aotearoa, kāore e roa ka whai wāhi atu tētahi kapa nō Aotearoa ki te ABL. Ka mutu, mā tēnei huarahi ka tino kite i te puawaitanga o ngā moemoea. Ko tāna anō, kia piki ake te kōunga o te kaitakaro poipapa me takaro ia rā atu, rā mai. Ka pērā te āhua o te whakataetae ABL, na wai rā, ka wāia haere ngā kaitakaro ki tērā āhuatanga, ka rite tonu rātou mō ngā whakataetae matua huri noa i te ao.

Atu i te ABL, ko ngā whare wānanga o Amerika tētahi huarahi e whanake ai ngā mahi poipapa. Kei te takiwā o te rua tekau ngā uri o Aotearoa kua riro i ngā karahipi e āhei ana rātou ki te takaro i te poipapa ki Amerika. He mea e tītia rawatia kia Ayden Hammond, kaitakaro o Bayside. Ko tētahi o ōna tino hiahia kia riro karahipi poipapa ki Amerika, ka mutu kia kake i te keokeonga o te ao poipapa hoki.

Mō ngā rangatahi nei, kei te karapu o te ringa te pae tawhiti, kua mau kia tata kia tīna.