Kaupapa: Waka Ama

Akuanei ka tukuna tana hoe waka ama kia whakatā e Anderson

Rahia Timutimu
  • Tāmaki Makaurau

Ko tā te toa waka ama o mua o te motu, otirā te ao tā Brad Anderson, koinei tana tau whakamutunga hei kaihoe waka ama.  Koirā te whakahau i mua i ngā whakataetae waka ama ā-motu, ka tīmata a ngā rā tekau mā tahi e tū nei.

Me te aha ka tukuna tana hoe kia whakatā, kua tata ki te rua tekau tau ināianei e karawhiua ana.

Koinei tētahi o ngā wā whakamutunga ka kitea a Brad Anderson e whakangungu ana.

Mō ngā tau tekau mā whitu kua hoe waka te uri o Ngāpuhi, ā, ka oti i tāna hoe waka ki te wāhi i tīmata tuatahi ai ia i te hākina nei, ki te karapu hoe waka o Manukau ki Tāmaki Makaurau.

Mai i taua wā, kua tino rerekē ngā whakataetae ā-motu.

Kua angitū ia ki te hākina nei, ā, kua haerere ia i te ao. I tae ia ki ngā whakataetae ā-ao ki Tahiti i te tau rua mano mā rua, Hawai'i i te rua mano mā whā, Aotearoa i te rua mano mā ono, Sacremento i te tau rua mano mā waru. Kāore ia i whai wāhi ki ngā whakataetae ā-ao ki New Caledonia, heoi i hoki kaha mai ia i te tau rua mano tekau mā rua ki Kānata, i reira wikitōria ai tana kapa i te mētara koura mō te rima rau mita, heoi anō, ehara tērā i tana mahara makau.

Ka haere tahi a Anderson me tana kapa Vaka Manu ki te whakangungu i tā rātou taitara ika a whiro tāne mo te tau tuawhā karapīpiti ki ngā whakataetae ā-motu, ki te wikitōria rātou anō ka ōrite ā rātou wikitōria ki tā Pineula, ko te pātai, ka noho tonu ia kia kapo ake ki te wikitōria tā rātou taitara tuarima?

Koinei hoki te tau whakamutunga a Anderson ki ngā whakataetae ā-ao, ki Ahitereiria hei te marama o Haratua.