Ahu atu ana ngā kapa rangatahi 3x3 o Aotearoa ki te whakataetae ā-ao

Ko te poitūkohu takitoru tētahi hākinakina hohoro rawa, tētahi tākaro matareka, tōna ritenga ki te whutupōro takiwhitu.  Hei tērā wiki tū ai te Whakataetae Poitūkohu Takitoru Rangatahi o te Ao ki Indonesia, ā, i toro atu a Te Kāea ki te whakaharatau whakamutunga mā ngā kapa o Aotearoa i mua i tō rātou wehenga atu āpōpō.

Ko te eke panuku te kōingo a te kapa tāne nei, pērā i te kapa o Aoteaora i te tau rua mano, tekau ma tahi, engari me hinga tuatahi i a rātou ētahi tira tautōhito i o rātou puna tākaro, pērā i te tira o Wiwī me Lithuania.

Koinei te whakataetae ā-ao tuatahi mō te kapa wahine nei, ā, hei tā te kaiako, kua whiriwhiria e ia tētahi kapa tātāwhāinga, tētahi kapa koi hei ātete i te ture kore kaiako i te wā tākaro.

Tuia atu, he hākinakina āhuareka te poitūkohu takitoru, me te hiahia nui a te Uniana Poitūkohu o te Ao kia whai wāhi te tākaro nei ki ngā Orimipia.

Hei te Rāpare o tērā wiki tīmata ai te whakataetae mā ēnei kapa ki Jakarta.