Ahakoa he iti, he māpihi pounamu

Mere McLean
  • Waikato/Te Waiariki

He taitamatāne Māori nō Tauranga Moana, e waru tau noa iho te pakeke kua tohua hei kaiwhakaharatau ki te Kura Whana Poikiri o te Ao ki Poihākena mō te kotahi wiki hei te Paengawhāwhā e tū mai nei.  Engari rā, e toru tau noaiho i muri iho kore rawa a Kauri Hohaia i tāea te paku aha i tana tūwhiri i tētahi momo mate e ngaukino ana i te roro me te tuaiwi o te tangata.

Inā tūtaki atu koe ki a Kauri Hohaia he tamaiti hauora noa te kite atu. Heoi, e toru tau ki muri i pā te mate ikuroro me ngā mate koiwi ki tōna tuara.

Hei tā tōna matua, a Owen Hohaia “I timata ngā mahi mō mātou mai i reira, ka haere ki te hōhipere o Starship i mua i tōna tino puka iku roro”

Me te mea anō hoki, ko Kauri te tuarua o ngā tamariki tokowhā, ko Brayden tōna tūākana, tekau tau ōna tau, ā, tōna tuahine ko Mackenzie he ono tau te pakeke, ā, ko Malikai te pekepoho, rātou katoa me Māmā rāua ko Pāpā tana taituara.  Kua roa a Pāpā e whai ana i te whutupōro me te riiki, ā, hei taana he mea hou kia tahuri ki ngā mahi whana poikiri.

Ka kii ake anō a Owen ”nā tōna ngākaunui, kua whai whakaaro anō mātou ki tēnei hākinakina, i haere au mō te wā tuatahi ki te mātaki i te whana poikiri i te taha i a ia.”

Kāti, kei te hiahia a Kauri kia eke ia ki ngā taumata tiketike i te ao whana poikiri, engari hei tā Mama e koa ana tana ngakau kua hoki mārika mai tana tama ki te ora.

“Me tuku rātou kia mahi te mahi a te taiohi. Kaua tātou e whakaahuru rātou i runga anō i te mataku, ka hinga rātou. E kore rawa rā te tamaiti e tupu tika i raro i ngā mahi pēnei”

Kei te mahi whakaemi moni te whānau Hohaia hei āwhina i tana haerere ki Ahitereiria, arā, ka kite ake ō rātou mahi ki runga i a Pukamata. Arā te kōrero matua, “Ahakoa he iti, he māpihi pounamu.”