Kua tutaki atu a Ahitereiria ki a Aotearoa i te whakataetae Trans-Tasman

Wikitōria Day
  • Ahitereiria

I tēnei wā e whakahaerehia ana te whakataetae pā whutupōro Trans-Tasman ki Ahitereiria, ā, ināpō i tū te kēmu tāne ki waenganui i a Aotearoa me Ahitereira.

He kakari nui i tū ki waenganui i ngā kapa e rua nei. I ngā mīniti tuatahi o te kēmu, i riro i a Scott Buckley nō Ahitereiria te piro tuatahi.

Hēoi, kāre i roa whai muri iho i hoki mai a Aotearoa. Ko te kaitākaro a Thomas Fitzgerald tērā i whakawhiti i te rārangi piro kia orite ai ngā tatau tahi ki te tahi.

I whai hua anō a Ahitereiria i tēnei piro a Sam Brisby, mea rawa ake ka whiwhi anō a Buckley i tana piro tuarua. He toru ki te tahi ngā tatauranga i te wā okioki.

I muri tata mai i te tānga manawa i hoki wawe mai a Aotearoa. I koke whakamua rātau i ngā mahi ihu oneone a Shaquille Stone.

Engari i puea ake te hiakai o roto i a Ahitereiria. I puta anō tō rātau ihu, mea rawa ake ka eke ngā tatau ki te whā ki te rua.

I pakanga tonu a Aotearoa mō te hemo tonu atu, ā, e rua karapīpiti ngā piro i whakawhiwhia ki ngā uri Māori a Henry Tuatea rāua ko Ruamai Erueti. Nā konā ka orite ngā tatau, whā ki te whā.

E mārakerake ana te kite i te tino pakari a te kapa whenua moemoeā. E toru anō ngā wā i hipa ai rātau i te rārangi piro, ā, I te mutunga o te kēmu, i toa rātau e whitu ki te whā.

He kēmu anō tā tō tātau kapa pā whutupōro tāne i tēnei pō. A ko ake nei tātau mōhio ai mehemea ka angitū rātau, ka aha rānei.