Kaupapa: Rugby League

I tū tiketike Te Tai Hauāuru i te whakataetae Ngā Hau e Whā

Lynette Amoroa
  • Ahitereiria

I whakahinga te kapa o Te Tai Hauāuru i ngā toa ō-mua i te whakataetae rīki Māori e kiia ana ko Ngā Hau e Whā.  I tū te tōnamana inatata nei ki Poihākena.

Mai anō i te tau rua mano tekau mā tahi te kapa nei e noho wikitōria-kore ana ki te whakataetae nei, heoi nā te tū hītarari i tutuki ai ngā wawata.

Ehara ngā poraka whero i te kapa tauhou ki ngā whiringa toa o te whakataetae Māori nei, heoi nā te manawanui i ārahitia ake te kapa o Te Tai Hauāuru ki te angitū.

Māia ana te tākaro a Te Raki mai anō te tīmatanga, i te hipatanga atu o tēnei i ngā kohao o Te Tai Hauāuru, heoi nā ngā ringa pakihawa kīhai i puta.

Nā wai rā, ka whai hua ko Te Tai Hauāuru i o rātou hapa, ā, kia whakairi i ngā kaute tuatahi ki te papa.

Mai i reira ka pupū ake a hautoa ki waenga i ngā poraka pango, ā, nā ēnei pūmanawa tākaro i eke panuku ana ai rātou. 

He inati te mutunga mai o te whana turuki.

I pei whakamua tonu ngā poraka whero, heoi i reira tonu te hoariri ki te whakararu i te whāinga.

I tū te kēmu mō tētahi wā poto, i te pakarutanga mai o te riri ki ngā pae tahataha.

Kīhai i aro atu ngā kaitākaro, heoi nā tērā pea i whai kaha ai te matakahi nei ki te wāwāhi i te rārangi ārai a ngā hoariri.

Ki reira ka whai ihi anō te kapa o Te Raki engari tē taea te whakangaro atu i ngā kaiārai.

Ahakoa i tutuki te whana hāmene, he tōmuri rawa te kati i te rua ki waenga i a raua.  He tekau mā ono ki te rua tekau mā toru ki te kapa Māori o Te Tai Hauāuru.