Kaupapa: UFC

Kei te kaha piata mai te whetu a Dylan Andrews i te UFC

Tamati Tiananga
  • Ahitereiria

Ko ia te Tūhoe kua puta ki te mura o te ahi UFC, hei enei rangi okioki, ka pakanga atu a ia ki te toki nei a Clint Lester no Amerika.

E ai ki te korero ko Andrews tētahi o ngā whetu maiangi o te wa, ka puta ki te papa whawhai UFC toru tekau ma toru ki te taha o ana hoa no Aotearoa a Mark Hunt raua ko James Te Huna me te aha, ko te huihuinga nei he tauwhainga whai tikanga i te hitori MMA o Aotearoa.    

I tutaki atu a Te Kāea ki te mahuri totara nei I tona kainga tonu, I whātaretia tona ao I waho atu I te whare Oranga, He Papa ki ana tamariki tokorua, he hoa rangatira ki tona tino ipo, he tauira pai ma te hunga rangatahi Māori e hia kai atu ana ki nga mahi UFC.

I pakeke mai a Andrews i Te Whanganui a Tara, engari kei Gold Coast a ia e noho kainga rua ana, heoi e mau kaha tonu nei ia ki tona whakapapa Māori, ki tona turangawaewae.

Hei tapiri atu, kei te ihiihi katoa a Andrews nā tāna whakahinga i a Papy Abedi, heoi mohio tonu ia he pakanga nui kei te haere ake ki a Clint Lester.