Kaupapa: Rugby

Te hāereere o ngā Melbourne Rebels i Aotearoa - Pūrongo Motuhake

  • Ahitereiria

Tekau mā whā tau heke iho, tekau mā ono tau heke iho anō o te kapa Melbourne Rebels ki Aotearoa ki te tūtaki atu ki ngā rangatahi o konei.

Ko te taenga tuatahi mai tēnei a ētahi o te kapa, ā, ehara i te mea kei runga noa i te papatākaro ngā akoranga, i ekea anō ko Tahuwhakatiki Marae i Tauranga i tēnei wiki. 

Waru tekau orau o nga kaitākaro i ēnei kapa e rua, he uri nō te Moananui a Kiwa, nō Ngāi Māori hoki, ā, hakoa tēnā he tuatahitanga tēnei mō te nuinga kia eke ai i te marae.

Ko tā tētahi kaitākaro U14, tā Mosese Tuipulotu, “He pai rawa atu tēnei wheako, he tapuwae ahau ki te marae heoi he mīharo tonu ki te ako i te ahurea nei, he koanga ngākau."

Hei tā Jeremy Nikora, te kaiārahi tikanga ā-iwi, mā tēnei wheako e whai painga ai ngā tama, koia hoki tētahi o ngā take nunui i hīkaka ai ia mō tēnei haerenga ki te wā kāinga.

He hōtaka taimaha mō ngā kapa e rua nei me ngā kaiwhakahāere, e whā ngā tukinga i ngā rangi e ono, i tīmata mai i Tāmaki Makaurau ki ngā kapa o East Tāmaki me te Kāreti o Kingi, huri ake ki te Tauranga mō ngā kēmu ki te Waiāriki kātahi i mutu atu tēnei haerenga o Aotearoa i Kirikiriroa inapō ki ngā tira o Waikato.

Kua roa nei a Jeremy Nikora e mahi ana hei ārahi i ngā taiohi i Poipiripi, ā, ko te whutupōro tana taputapu kia noho ai ngā tama ki te ara tika me te manako kia huri rātou hei kaitākaro whutupōro e utu ana a tōna wā.

Tāria ake te wā mēnā rānei ka mau i ētahi o ēnei kaitākaro te poraka Warapi, te poraka Ōpango rānei hei ngā tau e heke mai nei, kāhore e kore ka maumahara rātou katoa ki tēnei hāerenga ki Aotearoa hei tīmatatanga tūturu mō a rātou mahi whutupōro.