Kua hoki toa whakaihuwaka mai a Grant i te whakataetae BJJ Pan Pacific

Rahia Timutimu
  • Ahitereiria

Nōnākuanei i hoki mai ai a Anaru Grant ki Aotearoa i ngā whakataetae Brazilian Jiu Jitsu Pan Pacific i tū ai ki Melbourne. 

Nō taiwiwī, nō taiwawā anō hoki ngā kaimamau i ikapahi ai ki te kaupapa nei.  Ā, ahakoa i uru ai a Anaru ki ngā wāhanga e rua o te whakataetae rā, i haere rikarika atu tērā Māori, ā, i hoki toa whakaihuwaka mai.

Kua riwha noa iho te rā kotahi mai anō i tana hokinga mai ki te kāinga, ā, hanatu tonu atu a Anaru Grant ki te whare tū taua i muri tata mai i ngā whakataetae Pan Pacific i tū ai ki Melbourne.

Kua rongo noa atu ngā karoro i te kakara o āna mahi. Koia tēnei te take i hoki toa whakaihuwaka mai ai ia i ngā whakataetae tiketike rā, e rua ngā mētara kōura hei whakamahana i tana kakī.

Kāre anō tēnei pia nō te karapu o Tū Kaha kia hinga noa i tēnei tau, ā, ko tana matatau kei te tātua waiporoporo o tēnei hākinakina.

I whai wāhi ai tēnei toa ki te wāhanga kaka ōkawa, kaka ōpaki anō hoki, ā, he maha ngā pakanga i pahawa i a ia, heoi anō he wikitōriatanga ēnei i eke i te heke mārika o te werawera.

I rawe ai tēnei ekenga āna i te ekenga hoki a tana teina, a Hiwaroa, ki te tūranga tuarua o te whakataetae ōrite. Hāunga te take, ko te tuatahi noa iho tēnei o ngā wā kua rongo te teina i te poautinitini o tēnei momo hākinakina.

Ehara ko ia anake te tangata nō Tu Kaha i wikitōria i tētahi mētara.  O ngā kaiwhakataetae e iwa o te karapu, tokowaru ngā tangata i wikitōria, e whā o aua kaiwhakataetae he koura te hua.

Hei te marama e tū mai nei, tū ai te whakataetae e whai ake nei a Anaru.