Kua puta te ihu o Ahitereiria

Rahia Timutimu
  • Ahitereiria

Ko te kapa kura tuarua o Ahitereiria te tuatahi ki te whai piro, nā Charlie Taylor i ea ai.

I ngā meneti whai muri tata, ko rātou anō tērā i eke, i a Jayden Nikorima, i whakawhiti i te rārangi piro mō te tuatahi o ana pironga e rua.  I raro a Aotearoa mā ngā kaute tekau mā rua, ka kapo rātou i te pōro, kia whai piro ai a Mac Carson.

Heoi i hoki mai a Ahitereiria, ka whai piro a Cheyne Whitelaw i raro i ngā pou, āpiti atu ki ngā piro e rua i tutuki i a rātou i mua i te wehenga rua, kia ārahi ai a Ahitereiria, rua tekau mā waru ki te ono ngā tatau.

I te hiahia a Aotearoa kia wikitōria, ko rātou te kapa tuatahi ki te whai piro i te haurua, e rua ngā piro i wāenga i ngā meneti ruarua.  I muri kē a Aotearoa mā te tekau mā rua kaute, he āputa i whakawhāitihia ki te ono piro i muri i te whakawhitinga anō a Aotearoa i te rārangi piro.

Tekau meneti e toe ana, ka piro anō a Ahitereira, kia arahi mā ngā kaute tekau.

Heoi he whawhai ururoa kē tā Aotearoa, me te whai i tēnei piro whakahirahira, kia noho ai ngā kaute i te rua tekau mā waru ki te toru tekau mā rua ki a Ahitereiria.

I tata a Aotearoa i te meneti whakamutunga o te tukinga, heoi kāre i eke ki te rārangi. Ko Ahitereiria te kapa toa o te tukinga.