He taitara tuatoru te whai a te kapa Junior Warriors

  • Ahitereiria

He taitara tuatoru te whai a te kapa Junior Warriors hei ēnei rā whakatā, ka tuki ana rātou ki te tira Penrith Panthers ki te whiringa toa o te whakataetae rīki NRL mā te hunga kei raro iho i te rua tekau tau.

Kotahi rau, tekau mā rua ngā tatau i whiwhi i te kapa Junior Warriors i ngā wiki e rua kua hipa, nā whai anō tō rātou ngākau titikaha mō te whiringa toa o te whakataetae rangatahi NRL e kainamu mai nei.

Me whakaaro mahi ārai i muri i te whiringa whāiti whai tatau nui, manohi anō, koira tonu te aronga o ngā Junior Warriors i tēnei tau katoa.

Ka tuki atu ngā Junior Warriors ki te tira Panthers i te whiringa toa, he tira tautōhito i oti tuarua mai i te tēpu whakataetae, whai muri i ngā tākaro whiringa. 

He mea angitū anō hoki tēnei ekenga ki te whiringa toa hei whakanui tika i te mātanga kaiako a John Ackland i mua i tana wehenga i te karapu.

Hei te hauwhā ki te ono karaka hei tēnei Rātapu te whiringa toa tū ai i te Taiwhanga Hākinakina o ANZ i Poihākena.