Kaupapa: NRL

Kua kapo ake ngā kaupōai o North Queensland i te taitara NRL 9s

Tamati Tiananga
  • Tāmaki Makaurau
  • Ahitereiria

Kua eke panuku te kapa North Queensland Cowboys i te tuatahi o ngā tauwhāinga takiiwa NRL ki Tāmaki Makaurau.

Nā rātou te kapa Broncos i whakahinga, he tekau mā ono ngā tatauranga ki te whitu, i te whiringa toa.

Hei tā te poumuri o te kapa tā James Tamou, kaitākaro mō Ahitereiria, kaitākaro o mua o te kapa Rīki Māori, uri hoki o Muaupoko, i koke whakamua te kapa i runga i te upoko pakaru. 

I turakitia te kapa haukāinga, te kapa makau hoki o te whakataetae arā ngā Warriors i te whiringa whāiti.

He waru ki te kore ngā tatau whakamutunga, me te aha, i rite rā tōna tū atu ki te toki nei a Josh Hoffman, uri no Ngāti Pikiao me ngā ihu manea o te tira Broncos i te whiringa toa.   

I te tautokotia nuitia te kapa Broncos e te hunga mātakitaki, hēoi mo te kapa no Townsville arā kē ngā kaitākaro no Aotearoa tonu e pukeke mai ana.

Arā ko te whakaihuwaka whai piro o te reanga NYC rua tekau tau me raro iho, a Javid Bowen no Te Arawa, ā, koia pea ka whai atu ki te kapa tekau mā toru hāere ake nei.

I te whiringa toa, ko Antonio Winterstein rāua ko te hautipua no Te Atiawa a Curtis Rona era i ū atu ki uta ki a noho ai ngā tatau ki te tekau ki te kore i te wehenga rua. 

I hoki kaha mai te kapa Broncos, he toru meneti e toe ana ka puta a Ben Hunt ki a whai piro e rima māka te nui, hēoi i whakaporotū whirikoka tonu te kapa Cowboys ki a toa ai rātou.