Kaupapa: ANZAC

Willie Apiata VC addresses the public at dawn service

Heeni Brown
  • Tāmaki Makaurau

Ko ia anake te tangata e ora ana ki Aotearoa nei kua pinea ki te ripeka o Wikitōria.

Tokotoru noa ngā Māori kua tohua ki tēnei ripene toa mō ngā mahi maia ki te mura o te ahi, ā, ko Willie Apiata tētahi.

Ki Tāmaki Paenga Hira a Apiata waha ai ai i ōna whakaaro mō te rangi o Anzac.

Rawa i whakaae kia kōrero ā kāmera mai, engari i whakaae katoa a Willie Apiata kia kōrero kanohi ki te kanohi ki te tangata.

Hei tā tētahi uri o Ngāti Porou, tā Lamar Hayes e mea nei mō te tuatangata nei, mo Willie Apiata, “Hei tino iho pūmanawa ia mō tātou katoa te whai, ā, hāunga tērā, he Māori ia. He ngākau tapatahi tōna e wehi ai te ao”

Hei tā tētahi mama i tae ā-tinana atu, hei tā Elle Carstens, “Nō taku taenga mai hei tamaiti nohinohi, kua taimaha pea te kapo iho i te tino ngako o tenei mea te pakanga me ōna katoa, ā, ki te tangata whenuatanga hoki o Aotearoa. Nōreira, ko Willie Apiata pū tēnā e whakatinana ana i tēnā whakaaro”

I tēnei ata, ki tana whaikōrero, i puta i a Apiata ānā ake whakamārama mō te rangi o Anzac. Me tāna, he hoki ki tētahi whakataukī hei whakamahuki i te mea pai ki a ia, otirā 'he tangata, he tangata, he tangata'

Tokorua ngā Māori o Aotearoa kua tohua ki te rīpeka o Wikitoria. Nā, ko Tākuta Monty Soutar tērā kua roa e whai hāere ana i te toa tuatahi i a Te Moana Nui a Kiwa Ngārimu.

“Tērā pea rua tekau tau tana pakeke i te wā i uru a ia ki te rua tekau mā waru i haere ia ki rāwahi ki te taha o āna whanaunga whawhai ia ki roto i ngā whenua o Kerēhi, o Kerēti me Āwherika i roto i te whenua o Tūnihia i hinga atu a ia” te kii ake a Dr. Soutar.

Ā, ko Soutar tonu kei te haere waewae tapu atu me ngā uri o ngā hoia i pakanga ki Tunihia.

“Koinei te tau whitu tekau hipa i te riri o te pakanga, kei te haere tatou ki reira ki Tunihia kia kitea ai te puke i hinga ai ratou a Te Moana me oona whanaunga kia kitea a kanohi te urupa o Sevax kei reira ratou e tanumia”

Hei tērā wiki, he koni i te rima tekau uri Māori ka takihaere atu ki Tunihia, e ai ki a Soutar ka tau te ngakau i te mea ko te rangatahi ka pupuri ki ngā kōrero me ngā mātauranga o taua haerenga, tae mai te whakamaumaharatanga rautau ko rātou tonu te hunga mōhio.