Whanganui Mumu, ka whakarauorahia e ōna uri.

Tema Hemi
  • Te Tai Hauāuru

E kaha whakarauora ana e ngā uri o Te Awa Tipua i tētahi tikanga e tata mate ana. Ko Whanganui Mumu te ingoa o tētahi momo tukutuku ā he tokoiti noa iho e ora ana e matatau ana ki ōna kōrero, ki ōna whakapapa hoki. 

'To mu' koira ka rongo ai i te kēmu whaikīngi, ā koira hoki i rāngona ai e ngā rīriki i a rātou e mātakitaki ana i ngā kaiaru tohora kātahi ka puawai mai ai tēnei whakairo.

Ko tā tēnei kaumātua o Whanganui a Huia Kirk, "kātahi i waihanga mai ngā mātua me ngā kaumātua i tētahi whakairo arā i tapaina ko Whanganui ā Mumu, ko te kupu Mumu i kaha rāngona e nga tamariki o taua wā, 'your move' i roto i te kēmu."

I tae mai ai ko Apirana Ngata me ana kaiwhakairo kaimahi tukutuku hoki i ngā tau toru tekau hei whakarauora i ēnei tikanga, i tae mai hoki i taua wa ko Pineamine Taiapa.

Ko tā Kirk anō, "He nui tana tautoko mo tēnei kaupapa ā i te wa i rongo ia ka whakatu mai he whare karakia hōu ki konei i mōhio tonu ia he wā ka tika kia whāngai i ēnei mahi toi Māori."

Engari ko tā Twomey e kore e kitea i te hunga matatau ki ēnei momo mahi, "Kaore koe i tino kite atu i ngā tangata e mahi tukutuku arapaki ana ki konei ki Whanganui nei. Kua waimarie mātou i te momo i a Trina Taurua."

E motuhake ana tēnei whakairo a Whanganui Mumu ki tēnei rohe.

Ko tā Twomey anō, "Te tuitui i te arapaki he mea tērā engari ko tēnei mea te Whanganui Mumu he momo tauira, he whakairo nareira ka nui ngā tauira o tēnei mahi te arapaki. Ko ngā mea e mōhia ana, kei te mōhio whānuitia ko ngā mea pērā i a Poutama, Kaokao, Roimata Toroa, Purapura Whetū, Takitoru, Pātiki. Koira ngā mea e mōhio whānuitia ā ki roto nei ko Niho Taniwha, Whakarua Kōpito, a kātahi ko Papakirangi."

Ko te manako nui a Twomey ka ū tonu nga uri o te awa ki tēnei tikanga me te whakarauora ko ōna māramatanga ma ngā uri whakatipuranga.