Wellington hub records untold War stories

  • Te Whanganui-ā-Tara

Hei whakaoreore i te hinengaro i ngā mahara pakanga, i whakatūria he kerewēne ki te puku o te taone o Te Whanganui a Tara, e tono ana ki nga iwi kia kuhu atu ki roto ki te rekoata i o ratou ake kōrero tukuiho.

Inanahi ra ka tuwherahia he kaupapa hopu kōrero, kia mau ai ngā pakiwaitara o ngā pakanga o mua.

Hei tā Billie Tait-Jones nō Ngāi Tūhoe, Te Arawa hoki, “Ki te homai io ratou kōrero e pā ana heaha wā ratou hiahia mo te taone nei, e pā ana ki ngā hauora, ana i tēnei rangi he tuatahi tēnei ki te whakarongo ki ngā uri whakaheke i haere ā kāre nei i hoki mai o ratou uri i tāwahi.”

He maha ngā kōrero kua rongohia e Hohepa McDougall mo āna koroua a Tahae raua ko Ihaia Trainor, a koia tēnei e whakamahi ana i te kerewēne kaupapa hei whakapuaki mai i aua kōrero.

“Ahakoa ki ahau nei he itiiti noho waku mōhiotanga mo aku pāpā, ko ngā kōrero e whakaputa nei au, he kōrero i rongo au mai ngā pāpā i hoki mai i te pakanga, ā me waku mahi rangahau i runga i taku rorohiko i runga i te ipurangi.”

Ka nui ngā tautoko a Ātene Andrews mo tēnei kaupapa o te whakatū kerewēne ki waenga i te taone i āheitia ngā tāngata ki te hoki mahara mo ō ratou koroua me tō ratou koha ki ngā pakanga.

“Taku tipuna ko Tāre Tāre Heremana Charlie Hillman, kei roto i tēna take te tukunā kōrero ā me te kōrero hoki hei tohu mo taku whānau, aku tamariki mokopuna.”

Ko te nuinga o ngā kōrero he kōrero tuku, heoi ko te mea mīharo, kia puta, kia rangona, kia hopukina e ngā kaiwhakarongo, he taonga te mahara.

“He mea nui kia nōhio te ao, kia mōhio te motu, kia mōhio wā tatou tamariki mokopuna mo ēnei āhuatanga nui i pā kia tatou, i rerekē ai to tatou hapori, i rerekē ai to tatou noho, wēra āhuatanga katoa,” hei tā McDougall.

Hei te otinga o ngā mahi kerewēne inanahi, kua rekoatahia ngā kōrero, kua hoatuna a ratou kape, kei runga irirangi, pae tukutuku hoki.