Kaupapa: Education

Waikato- Tainui reo strategy aiding student achievement

  • Waikato/Te Waiariki

E ono tekau mā rima ngā kaiako reo Māori nō Waikato-Tainui, kua whakakotahi atu ki te kurutetenga huatau tuatahi o Te Reo Kāpuia mo tēnei tau.

Kei tōna tau tuatoru te kaupapa whakapakari reo Māori nei, ā, e ai ki ētahi o ngā kaiako kei te kitea kē ngā hua o ēnei wānanga i ngā whakatutukitanga NCEA.

Kāore he paku whakatā mā ngēnei pouako e tārai ana, e whakawhānui ana ō rātou mātauranga i te mita me ngā kōrero tukuiho a Waikato-Tainui, i ngā wā whakatā

Ko tā Cassandra Morgan, Pouako, Te Wharekura o Maniapoto, “E kaha ana ā mātou kaiako ki te akiaki ki te whāngai i ngā kōrero e tika ana ki a tātou tamariki kia eke panuku i roto i te NCEA, ahakoa te taumata.” 

Ko ngā ākonga mai i ngā kura tuākana e ono i te rohe kua whakawhiwhia ki a kotahi rau ōrau i ngā whakamātautau NCEA pae tahi, pae rua, pae toru rānei arā, ngā wharekura o Rakaumangamanga, o Manurewa, o Te Kaokaoroa o Patetere, o Te Rau Aroha, o Maniapoto anō hoki.

Hei tā Morgan, “Ko ētehi o ā mātou tamariki kua eke ki te pae tuatoru o te NCEA, i roto i ngā tau ahakoa kāore anō kia eke ki te tau tekau mā toru.”

Pania Whauwhau, Pouako, Te Kuratuarua o Melville, “Nā te noho tahi, nā ngā whāinga o Waikato-Tainui, aww, me tika aku mahi whakaako ki aku ākonga kia puawai rātou i roto i ō rātou Tainuitanga, Waikatotanga, Maniapototanga, nā reira pea te take kei te eke haere, kei te eke pai ā tātou kura i roto i tēnei rohe.”

Ko Te Reo Kaapuia te wānanga reo tuatahi nā Waikato-Tainui i whakarewa i te tau rua mano tekau mā rima, i raro i tōna rautaki Whakatupuranga rua mano rima tekau, kia waru tekau ōrau o ngā uri e matatau ana ki te reo.

Hei tā Pania Papa, Pouwhakahaere, “Me taku whakapae anō, ki te mōhio te tamati ki tōna tuakiritanga, ki te hītori o te rohe rānei e nōhia ana e ia e rātou ko tana whānau, ka piki tana mōhio ki ngā āhuatanga o ngā here ki te whenua, hononga ki ngā iwi i waenganui a tātou, mā reira pakari ai te tū a te tauira i roto i te kura.”   

Ka tū te wānanga tuarua nei ā te tekau mā whā o Hurae.