Kaupapa: Education

Tūmeke ana te mātotoru o te hunga tamariki i whakarauika atu ki te tahamoana o Tauoma ki te pōhiri mai i ngā waka o te Moananui a Kiwa

  • Tāmaki Makaurau

Tūmeke ana te mātotoru o te hunga tamariki i whakarauika atu ki te tahamoana o Tauoma ki te pōhiri mai i ngā waka o te Moananui a Kiwa, e tere nei i ngā moana o te ao, i runga i te kaupapa Malama Honua.

Nei rā, ko te tohatoha i te mātauranga e pā ana ki te manāki i ngā tikanga o ia iwi taketake o te ao, mō te oranga tangata, oranga taiāo, oranga wairua.

He tira waka e tere ana i ngā moana o te ao, kua tau mai ki te tahamoana o Tauoma, i roto o Ruapotaka, ki te whakarewa i tā rātou kaupapa e kīa nei ko Malama Honua.

E ai ki a Jerry Norman, “Tēnā rātou e manāki ana i te taiao pēnā ia Tangaroa, pēnei ia Tānei Mahuta, pēnei i te ira tangata, tirohanga whānui ki roto i te taiao.  Me pēhea e akiaki i ngā tamariki ki te piki ake ki te whai i tēnei āhuaranga taiao, e taea ai ngā tūranga teitei i roto i te wānanga, mātauranga katoa.”

Hei tā Kathryn Matayoshi, “He whenua motuhake mātou pēnei ia Aotearoa, a ko tā mātou he whai i ngā mātauranga a tēnā iwi a tēnā iwi taketake o te ao.”

Ki tā David Lassner, “Ko te oranga o te ao whānui te take me mahitahi rawa tātou ki te whakatutuki, me kī ko tāu rourou, ko te rourou a te Pākehā, me te mātauranga o ngā tamariki.”

Kāre anō pea kia kitea he pōwhiri nunui rawa atu i tēnei,ki te whakatau mai i ngā waka o Hokulea me Hikianalia, nā te whakakotahi mai o ngā kura i raro i te mana o Manaiakalani.

Ki tā Jerry Norman, “Nā tētahi tangata Māori i kawea mai kia kōrero i tērā kōrero, kātahi ka whakauru atu ki roto i ngā kura tekau mā rua, ngā tamariki i konei, rua mano rima rau.”

Hei tā Shawn Kana'iaupuni, “Mīharo rawa te kite i te mana, te wairua hihiko o ngā tamariki me ngā pākeke anō, ko te whakakotahi o te hapori, koinei tonu te Malama Honua e kōrerohia nei e mātou, te ataahua mārika.”

E ai ki a Kathryn Matayoshi, “Tūmeke ana ahau, te kite i ngā tamariki me ngā tauira kua tae mai nei ki te pōwhiri ia mātou, mīharo rawa atu.”

Hei tēnei pō tu ai te Hui Taumata Mātauranga i waenga i ngā Mana mātauranga o Hawai'i me ērā o ngā iwi maha o Aotearoa, kia whiriwhirihia te tino whainga a Malama Honua.