Tūhoe reo activist support removal of “G” in written language

Taroi Black
  • Waikato/Te Waiariki

E whakaae ana tētahi kākā tarahae mō te reo o Ngāi Tuhoe, a Rangitunoa Black kia whakakore atu te pū 'g' i roto i reo tuhi a Tūhoe. E whai ana tēnei i te whakapuakitanga a Te Uru Taumatua kia rite ngā tuhinga kōrero a te iwi ki tōna ake mita.

Kei te tautoko a Black tēnei whakaaro a Te Uru Taumatua me tona kaupapa whakarauora i tōna ake reo.

“Koina rā te mana motuhake o Tuhoe, ko tana reo. He mana tō taua reo, he tāonga tuku iho.”

Nonatata nei ka puta te korero a Tamati Kruger Kaiwhiriwhiri Kereme a Tuhoe ki a Te Kaea, he whakaaro tenei hei whakamana it e mita a Tuhoe, ara me whakataka te 'g' mai i te pū 'ng' i roto i te tuhituhinga me te kōrero hoki te reo. He whakaaro kua whakapatari i te tini maha.

Hei tā Black, “Ko te mea nui ko te hiki i te mana o ngā tīpuna i runga i te Tiriti o Waitangi kāre mā tētahi ki te hāhāni ki te whakamātautau ngā mana o ngā rangatira huri noa i te motu. Koina te ahuatanga o ngā māta waka, me mau tonu ki āna whakaaro ki ngā kōrero, ki te mita o te reo tuku iho o ā rātou mātua tīpuna nātemea ko te reo e pupuri ana i te mauri, te mana te ihi, te wehi o ngā mātua tīpuna, kua oti kē ia rātou te whakatakoto i roto i te reo, ā, i roto i ngā kupu, i roto i ngā kaupapa.”

Engari ehara i te whakaaro e tautoko ana i te katoa, hei ta Harata Williams he kuia no Tūhoe kua roa e noho ana ki Tamaki Makaurau, me noho te kupu 'ng.

Hei tā Williams, “Pena he 'g' kāre rānei me hāere tonu. Ko te mea nui hoki ko te reo. Waihohia ngā kupu mā rātou tonu tēra e whai whai pakeke ake rātou, kia hoki atu ki a rātou iwi ake ana ka rongo rātou i te mita ake mo rātou hapū, iwi rānei. Kua tau mātou ngā whakatipuranga o te iwi nei o Tuhoe, kāre he wehewehe, he tango rānei tēnei mea te 'g'. Kua waia kē mātou ki te kōrero i roto i te reo kāre te 'g' i roto. I pakeke mai, i tipu mai i roto i tēra āhuatanga. Nōreira ki tō pātai, kāre he aha.”

Ka whiriwhiri tonuhia tenei take, hei take wananga mo te rautaki reo a Tūhoe.