Kaupapa: Crime

Tokowhā ngā tāne kua uhia whakapae mō te kōhurutanga o Raymond rāua ko James Fleet

Mānia Clarke
  • Waikato/Te Waiariki

Tokowhā ngā tāne e whakawāngia mō te kōhurutanga, te matenga pōkerehū rānei o Raymond rāua ko James Fleet. E toru tekau mā toru tau te pakeke o Martin Hone, e rua tekau mā tahi ngā tau o Mikaere Huna, e rua tekau mā ono tau te pakeke o Zen Pulemoana, ā e rua tekau mā iwa ngā tau o Richard Tūwhakakorangi Te Roaroa Te Kani i tū kua tū ki mua i te aroaro o te Kōti ā-rohe o Rotorua.

Kua uhia te whakapae ki a Martin Hone, Mikaere Hura me Zen Pulemoana mō te kōhurutanga o Raymond Fleet, rima tekau mā tahi ngōna tau rāua ko tāna irāmutu, rua tekau mā tahi te pakeke.

E whakawātia ana a Richard Te Kani, mō te matenga pokerehū o Raymond rāua ko James.

Ko te whiu mō ia hāmene, he noho mauhere mō ngā tau toru tekau neke atu.

E rua tekau neke atu ngā whakapae ki te tokowhā. Whērā i te huna tūpāpaku me te hanga i te taimiri P.

Nō te rangi tekau o Hereturikōkā i ngaro atu te matua kēkē rāua ko tana irāmutu. I te wiki whai muri atu i ara ake ai tētehi rangahau kōhuru i te kitenga o ō rāua tūpāpaku i te ngahere o Mamaku.

Kāore anō te tokowhā kia whakahoki kōrero ki ngā whakapae. Ko te whakatau a Kaiwhakawā Greg Hollister-Jones kia noho tonu rātou ki te whareherehere kia tū rā anō ki te kōti teitei hei te rua tekau mā rima o tēnei marama.