Tokotoru ngā rangatahi kua tukuna ki te hōhipere whai muri i te kai kāpuni

Heeni Brown
  • Tāmaki Makaurau

Koia ko te tino kaikōhuru o ngā kai whakapōauau, ko te momi pūwaro, ā, te āhua nei kei te ara ake anō te taniwha weriweri nei, whai muri i tētahi pahūtanga nui ki tētahi whare i Papakura, i Te Tonga o Tāmaki Makaurau. Tokotoru ngā rangatahi i haria ake ki te hohipea, ko ō rātou tinana i wera ki te ahi me te whakapae, i te momi pūwaro rātou.

Ki roto i tētahi whare-iti kōwhai ināpō tahuna ai tētahi tokotoru kei ngā tau tekau mā ono ki te rua tekau tau te pakeke, whai muri i te kai-kāpuni butane.

Hei tāpiri ki te kainga o te whānau Hikitāpua, ko ētahi atu o ngā kainoho hoki i mea ake he poto noa iho te noho mai o te whānau ki tēnei whare, ā, he whānau i noho motuhake.

I whakapā atu mātou o Te Kāea ki ngā kainoho o tēnei whare, ā, i pātōtō hoki i te kuaha engari horekau he tangata ki te kāinga.

Engari, i kōrero mātou ki a Darryl Horn tētahi o ngā pirihimana i whai wāhi ki te aituā o inapō.

Ō ngā mate kaikāpuni butane ono tekau mā toru mai i te tau rua mano ki naianei, he tata ki te rima tekau ōrau o ēnei matenga he Māori, ā, he waru tekau mā whitu ōrau o tēnei hunga i raro tonu i te rua tekau mā whā tau.

E ai ki tētahi mātanga paihana, ko te kaikāpuni butane te kaikōhuru whakapōauau o ngā whakapōauau katoa, ā, ko tā ngā pirihimana kōrero e waimaria ana ngā pārurenga o inapō e ora tonu ana rātou.

Koinei tonu te tiriti i kitea ai te pahūtanga, e ai ki ngā pirihimana kua kore he hāmene mō te tuku i te kapuni butane ki roto i te tinana.

Engari e ai ki ngā pirihimana ka hoki mai rātou ki te kōrero ki ngā kainoho mō ētahi taputapu i whaia e rātou.