Kaupapa: Ngā Manu Kōrero

Tīpatere ana ngā iwi ki Te Whanganui-a-Tara mō Ngā Manu Kōrero

Heta Gardiner
  • Te Whanganui-ā-Tara

Tīpatere ana ngā iwi ki Te Whanganui-a-Tara i runga i te karanga o Ngā Manu Kōrero.  Hei te roanga ake o tēnei wiki whakataetae ai ngā māngai toa ā-rohe mō te mana tohu i ō rātou īngoa ki a Pei te Hurinui, ki a Korimako, ki te Rāwhiti Īhaka me Turi Kara i te ekenga o te whakataetae ki tōna tau rima tekau.

E ai ki a Paora Trimm, “Ka whakarite tēnei whakataetae i a rātau, mō ngā tūranga mahi nui o te ao, kia tū māia tū kaha.”

Ko te iwi kāinga, me ngā taonga, i tūtaki, ihu ki te ihu i te rā nei.  He noho tahi ki konei ki ngā rekereke o Porirua, whanga ai mō ētahi ringa tiaki hōu.

Ko te tihi tērā te whai o te katoa, ēngari mō tētahi toa o mua, he māmā ake te tirohanga.

Ki tā Waaka, “Ko tērā te whāinga nui, ko te whakaako i te reo Māori.”

I ngā 50 tau kua hori, e hia kē nei ngā toa, kua puāwai mai hei toa whaikōrero, hei kaiārahi mō te iwi anō hoki.

Hei tā Paora Trimm, “Kia titiro tātau ki te tini o ngā tāngata, rongonui i ēnei rā i tū ki te whakataetae nei, nō reira he mārama te kite i ngā hua o tēnei whakataetae.”

E ai ki a Te Kepa Stirling, “Ko ngā manu kōrero i ngā tau ki muri, ko rātau ētahi o ngā kaiwhiriwhiri.”

Ki tā Waaka, “E hoa, kua piki noa atu te taumata i te wā i āu!”

I tōna wā, kotahi noa te reo kōrero mō ngā manu kōrero, arā ko te reo Pākehā.  I te huringa o ngā tau, i tāpiritia ko te wāhanga kōrero tene mā ngā pakeke, te wāhanga reo Māori hoki.

Ko ia e noho mātāmua ana i tēnei wā.

Ēngari e rite tonu ana te tuāpapa, ko te tuku i ngā manu kōrero, kia rere.

E ai ki a Stirling, “Kia taea e ngā tamariki, te whakapuaki i ō rātau whakaaro, pērā ki te haki nei e kōrerotia e ngā tāngata.”

Ka tīmata te whakataetae hei te rā Rāapa.