Tipa Mahuta refutes National election rumors

  • Waikato/Te Waiariki

Kei te kaha whakahē a Tipa Mahuta i ngā kōhimuhimu e mea ana, ka tū whakataetae ia ki tōna tuahine, ki a Nanaia Mahuta, mema paremata o Hauraki Waikato, hei te kōwhiringa pōti ā tērā tau. Hei tā te hea tuarua o Te Kaunihera a-rohe o Waikato, kei te mau tonu tana titiro ki te mau ki tana tūru Māori mete kōwhiringa ki te poari hauora a-rohe o Waikato.

Kei tōna ūkaipō o Waahi Paa me tōna iwi te ngākau o Tipa Mahuta e ora pai ana.

Ā, e ngana ana ia kia hoki ai hei māngai Māori mō te rohe o Ngā Hau e Whā, kia whai tūru hoki i te poari hauora ā rohe o Waikato, kaua kē ki te ao tōrangapu.

Hei tā Mahuta, “Pai ki ahau te noho ki te kainga, whāngai i aku iti noa nei ki te hunga rangatahi o taku kāinga.  Kāore tāea e au i Poneke i wāhi kē atu, tuatahi, tuarua, āhua tamariki tonu taku whānau kia ngaro au ki Poneke hoki.”

E ai ki tētahi Kuia no Waikato a Mamae Takarei, “I heke mai tēnā kauae rangatira whakaaro mai i tana tūpuna mai i a Te Puea.”

Nō te marama o akuhata i puta te kōrero i a Willie Jackson, matanga tōrangapu i te hōtaka o Kawe Kōrero, ka tū a Tipa hei kaitono mō te Pāti Māori hei te kōwhiringa pōti e tū nei.

“Tuku (Morgan) may be talking to Nanaia's younger sister, Tipa.”

Engari, kei te whakahē tērā kōrero i a Tipa

“I te wā o pāpā nē nāna i kī mai koe kei te motu, ko koe kei te kāinga.”

Kotahi anake te kaiwhakataetae atu i a Tipa e whai ana i te tūru Māori, ā, nā tana toahanga nui i tērā kōwhiringa mā ngā pōti kotahi mano whitu rau, ko te whakapae ka mau tonu i a Tipa tana tūru.

E ai ki te Hemana tuarua o Whakakitenga a Whakahawea Rapana, “Kaha wero i te tangata mēnā e whakaaro ana kāore e tika ana tērā kaupapa ka wero atu ia me te tiro whānui ki waho o te pouaka, ehara i te tangata tiro whāiti.”

Hei te katinga o te pōti ā pouaka poutāpeta hei te poutūtanga o te Rāhoroi nei, tau ai ngā hua.

Tuaritia: