Ngā kaupapa: Arts, Te Arawa

Tikanga ō kawa mo te hunga noho taupuni

Mere McLean
  • Waikato/Te Waiariki

Kei te kī a Te Arawa ka pōhiri tonu rātou i ngā tūruhi, pēnei i hunga noho taupuni engari me mārama pai rātou ki ngā tikanga ō kawa i mua i to rātou taenga mai.

He raru nui te hunga noho taupuni ki Rotorua engari ko te whakapono mai i a Rawiri Waru, tētahi o ngā māngai o Te Arawa ki te kaunihera roto moana o Rotorua, ko ētahi kē kei te whakararu mo te katoa. “Te mate hoki pea kei te hara mai ētahi o ngā tūruhi ngā manene i tāwāhi, ki te rēhi i ngā taraka nui rā, ā, ka haere, ka haere, ā, ka haere ki ngā wāhi nei e kī a nei he wāhi mo ngā taraka turuhi nei, ana ka tuku ngā para, ngā rāpihi ka waiho atu.”

Waru rau ma ono ira rima miriona tāra ka tae mai ki Rotorua na runga i ngā mahi tūruhi ia tau, ko te tūruhi tētahi o ngā tino mahi ki te rohe, ā, kei te aro hoki te kaunihera me pēhea te hapai i te hunga ka tae mai. Ki tā Waru anō, “I mua i to rātou taenga mai ki rohe nei, anei ngā tikanga mehemea kei te hurihuri haere koe ki tēna hōpuni ki tērā noho te aha rānei, anei ngā tikanga hei whaiwhai atu ma koutou.” Hei tā Waru anō ēhara ko rātou anake e rongo ana ki ngā raru e pā ana ki te hunga noho taupuni engari he kaupapa kia whakatikahia.

Hei tā Waru anō, “I te mea kei konei te tini me te mano o ngā tūruhi o ngā manene e haere mai ana i tāwahi, ana, haere mai ki konei.” Ki tā Tāpoi Rotorua, mo te rua pō ka noho mai te hunga noho taupuni ki roto i a Rotorua i mua i to rātou wehenga ki wāhi kē.