Kaupapa: Water

Tiakina ngā wāhi tapu i te pāpuni wai o Ruataniwha te kii a te iwi

Aroha Treacher
  • Te Tai Rāwhiti

Ko te wiki tuawhā tēnei o te arotake i te tono mō tētahi papuni wai ki Ruataniwha, ā, e rongo ana i ngā tāpaetanga kua tau ki te aroaro o te poari arotake.

Huhua ana ngā kaitaunaki i tū ki mua i te aroaro o te poari, huhua ana ngā kōrero i pānuihia, otira, e hiahia ana a Ngāti Kahungunu kia tiakina o rātou wāhi tapu.

Hei tā Ngahiwi Tomoana, heamana o Ngāti Kahungunu, “Tino maha ngā wāhi tapu, i runga i te awa o Tukituki me te taha mai ngā maunga tae noa ki te wahapū o te awa.”

Ko te tiaki i ngā wahi tapu me te kounga o te wai ngā mea mana nui ki a rātou.

I whakatūria te poari kia whakaarohia ai ngā whakaaetanga mō te kaupapa pāpuni wai nei, engari, ko tā te kaihautū o te Rōpū Reipa, ko tā David Cunliffe, kāore ia i te whakapono he huarahi pono kua whaia mō te kaupapa nei, otira, me whakātu ngā kōrero katoa ki te iwi whānui.

Tae noa ki tēnei wā, kua rangona e te poari he āwangawanga mō ngā take pēnei i te kounga o te wai, te iti noa o ngā whakatewhanga mō te taiao, me ngā whakaaro weherua mō te kaitiakitanga o te whenua me ngā wai o te rohe.