Ngā kaupapa: Water, Water

Three groups appealing Creswell NZ

Mere McLean
  • Waikato/Te Waiariki

He mea takahi i te tū kaitiaki, tū tangata whenua hoki o Ngāti Awa. Koinei tā te Tumu Whakarae o taua iwi a Leonie Simpson i muri i te tuku whakaae ki te tono o Creswell NZ kia whakawhānui i te tango wai. Ko Ngāti Awa tētahi o ngā rōpū e pīra nei i te whakaaetanga a te kaunihera o Whakatāne me te kaunihera taiao o Te Moana Toi. Ki tā Leonie Simpson anō “kāre mātou i whakaae ki te tuku ngā wai, kotahi piriona rita mai tēnei puna, kāre mātou i te whakaae ki tērā nā te mea ko mātou, Ngāi Māori, ngā kaitiaki o Papatuanuku me Ranginui he tātai whakapapa tatau nō reira, ko mātou ngā kaitiaki”. Kua tuku tono whakahē a Te Rūnanga o Ngāti Awa, Sustainable Ōtākiri me te Kaitiaki whakatau kerēme o Ngāti Tūwharetoa ki Kawerau i te tono whakaae ki a Creswell NZ kia whakawhānui ake i te tango wai mai i te puna o Otakiri . “Kia noho tahi ai mātou ngā iwi me ngā hapū o tēnei, o te rohe ki te taha o ngā kaunihera, te kaunihera ā rohe ki te hanga mai ētahi kaupapa e pā ana ki ngā wai Māori” ki tā Simpson. E ai ki a Creswell NZ kei te wātea rātou ki te kōrero hei whakatikatika i ngā nawe o ngā kaiwhakahe. E ai ki te kaiwhakahaere o Creswell NZ he aronga nui tēnei kaupapa kia tika ai nga whakataunga ā he kaupapa matua hoki ngā tono pīra ki a rātou. Ko te kamupene wai nunui a Nognfu Puna ngā rangatira o Creswell ā kua whakaae tā rātou tono i raro i te ture Overseas Investment kia hoko i te whenua hei whakawhānui i nga mahi tango wai. “Kia whakakorea, koira te mea tuatahi, kia whakakore tēnei raihana ki te tuku wai mai tēnei puna, ā, tuarua, mena kāre e tāea ki te whakakorea” ki tā Simpson. Tekau mā whitu mano ngā uri o Te Rūnanga o Ngāti Awa, ā, kei te rite rātou kia turakinahia te tono. “Kāre rātou e tino āta tirohia ki tā tatau hononga ā iwi, ā hapū rānei ki te awa o Tarawera me tēnei puna o Ōtākiri me Awaiti”. I roto i ngā tau e whā e haere ake nei, e ono tekau ngā tūranga mahi ka whakatūhia e Creswell NZ ki te whare pātara wai o Ōtākiri.