Kaupapa: Education

Tērā te āwangawanga a tētahi tumuaki wharekura mō ngā ture hou mō ngā kura hourua

  • Tāmaki Makaurau

Ko te whainga matua o Te Puna Wānanga kia whakangungu tika i ngā tauira e whai ana i ngā taumata o te mahi kaiako, i roto i ngā tau e toru, hei whakakikī i ngā kura maha hou ka whakatūhia i tēnei tau.

Heoi tērā te āwangawanga a tētahi tumuaki Wharekura mō ngā ture a te Manatu Matauranga e kī nei kāore ngā kaiako Kura Hourua e mate ki te whai tohu kaiako.

He mea nui tonu kia whiwhi ngā kaiako o ngā kura katoa i ngā tohu tika hei ako i ā tātou tamariki mokopuna, koia nei te kaupapa a Te Puna Wānanga i tīmata nei a ratou karaehe whakako kaiako i te rā nei.

Hei tā te Tumuaki o Te Puna Wananga, a Te Kawehau Hoskins, “Ko tērā tō mātou mahi i konei mahi nui i roto i ngā tau e toru, whakāko i te reo kia rātou engari me kaha rawa tō rātou reo i roto i ngā tau e toru me mōhio rātou ki ngā marautanga katoa, me mōhio hoki rātou me pēhea te whakāko.”

Ko tētahi o ngā kura hourua ko Te Kura Māori o Waatea, ka whakamanahia a tēnei wiki tonu, kei te marae o Ngā Whare Wātea, he rerekē anō ngā tikanga mō ngā kaiako o ēnei momo kura hou.

E ai ki a Willie Jackson o Te Kura Māori Waatea, “Kua rongo mātou i ngā whakahē e pā ana ki ngā kaiako nō te mea kāre ngā tohu, a kāre au i mahi pēnā, i tautoko au i tō tātou hapori i te mea e tika ana ki te tiki i ngā kaiako me ngā tohu, pai ana ngā kaiako i roto i tō mātou kura i tēnei wā.”

Ki tā Maahia Nathan, te tumuaki o Te Wharekura o Manurewa, “Te āhua nei kua waihangatia e te Kāwanatanga nei tētahi huarahi mō ērā o ngā kaiako mahue mai ko ngā huarahi mō mātou me rēhita, me whai tohu, ērā mea katoa.  I roto i ngā kura hourua e taea te tangata ki te hou atu ki ngā kura hourua ako ai, ka mutu horekau anō kia rēhitangia horekau he tohu kaiako, ērā mea katoa.”

He āwangawanga nui tērā mō Maahia Nathan, kua tekau mā ono tau ianainei e tatari ana kia whakatūhia e te Manatu tō rātou kura hou.

Hei tā Maahia Nathan, “Kua roa kē mātou e tatari ana kia whakatuhia tō mātou kura hou, me te mea anō ko ngā kura hourua nei, nā roto i te rima mēneti, kua tū, nā reira kua kite tātou i te āhua o te Tāhūhū, te āhua o tēnei Kāwanatanga, ka wātea rātou i te rahi o ngā pūtea mō ngā kura hou nei, kura hourua, mahue mai ko ngā kura pēnei ia mātou me ērā atu o ngā Kura Kaupapa kua roa nei e haere ana, tatari ana kia whakātuhia ko a mātou kura hou.”

Heoi kei roto i tēnei Wānanga e whakapau kaha ana ngā tauira ki te whakapakari o rātou pukenga i roto i ngā tau e toru, hei te otinga ka whiwhi tohu, ka whai rehita, ko ngā tauira o ngā kura ka waimaria.