Kaupapa: Health

Te whawhai a Papa T i te mate pukupuku

Aroha Treacher
  • Te Whanganui-ā-Tara

Koia tētahi o ngā pou o te kōhanga reo, e toru tekau ngā tau ki muri i tīmata ai ia i te kōhanga reo o Wainuiomata i ngā tau waru tekau.

Ko Tīpene tētahi o ngā tohunga mau rākau, e hia mano ngā tāngata kua whakaakongia e ia. Koia hoki tērā i te hōtaka Toa o Aotearoa, he hōtaka i whakamārama atu i te ao tawhito o te mau rākau.

Ā, ko taua wairua toa anō ka kawea e ia ki tōna ake pakanga ki te mate pukupuku.

Hei tā Tipene Rangihuna, ka whawhai tonu ia i tana whawhai.  Koinei tana hauora, tana oranga.  Mā ngā mahi nei e ora ai ngā tāne Māori.

I tērā marama noa, i pā mai te mate pukupuku repe tātea ki a ia, i tōna tau ono tekau mā toru.  He inoi tāna ki te hunga tāne e karo ana i ngā whakamātautau mate pukupuku.

Ko te āki a Papa T ki ngā tāne Māori katoa, kia kaua e whakamā, kia haere ki tō tākuta!

E mōhiotia whānuitia he tangata mahaki ia, engari, ki te riro i a ia te poka i te hohipera tūmatawhāiti, ka utua e tōna whānau he rua tekau mano ngā tāra.  Heoi, riro kē i a rātou he whitu mano tāra, engari, he tekau mā toru mano e hiahia tonu ana.

I kii mai tana tamāhine, a Te Ara Ripeka Rangihuna, he tino waimarie rātou nā te tautoko o te marea, Māori mai, tauiwi mai.

Ki te uru atu ia ki te rārangi tatari o te iwi whānui, tērā te tūpono, ka horahora te mate pukupuku ki ona wheua. Nō reira, e ūpoko pakaru ana rātou kia awhi i a ia ki mua tōna taenga atu ki te hohipera mō te poka āpōpō.