Kaupapa: Kapa Haka

Te Wharekura o Hoani Waititi Marae crowned Division One champions

  • Tāmaki Makaurau

Nō te pō rā whakaingoatia ai a Te Wharekura o Hoani Waititi Marae hei toa whakaihuwaka i te wāhanga tuatahi o te ahurei Poronīhia mō tēnei tau. Kua roa te wā rātou e whanga ana ki te wikitōria nui o te rohe o Tāmaki Makaurau
Ā, i kitea te mana me te ihi o te marae i te whakahokitanga atu ki te kura.

Koinei ngā tūmanako kua ea i a rātou

Hei tā Kawariki Morgan – (Ngāti Porou, Ngāti Hine, Tainui), “Kua roa te wā e tatari ana te kura nei kia hoki mai ngā taonga ki te poho o tōna whare. E hurō ana te ngākau. Me pēhea e kore ai?”

Hūrō ana te whare o Ngā Tūmanako i te marae o Hoani Waititi ināpō, i te whakahokitanga mai o tōna wharekura hei toa whakaihuwaka o te wāhanga tuatahi o te ahurei Poronīhia mō tēnei tau.

Ko tā Ana Berry-Tumoana, Kaiako, “Ko tā mātou ia tau, ia tau e ngana nei, kia riro i a mātou te mita o te reo, ki te riro tērā ki a Waititi, ki a mātou kua toa, kua rangatira ngā mahi.”

I ngā wāhanga e whitu o te rārangi mātāmua, i riro i a Waititi e ono o ērā, ā, ka whai mai ko ngā kaipupuru i te māuri o te whakataetae, Ngā Puna o Waiōrea i tae tuarua mai. Ā, ko ngā Hine Keira o Kahurangi ki Maungawhau i tuatoru

“Tērā ētahi e kōrero ana kua ngaro te tino ngau o ngā, te tino kaha o te kura nei i ngā mahi haka, ā, kua kite kua hoki ora mai rātou i tēnei rā,” ko tā Morgan

He noho tonu anō ki te āhuru o te whānau, me te mōhio nui ka haere tonu ngā haepapa nui o te kura.

Hei tā Ne'Kol Hura, Kaiako Reo Māori, “E whakatō ana mātou i te kākano i roto i ngā tamariki kia tū hei toa tauā mō te reo, ko te whakatutukinga o ngā moemoeā tērā.”

“Ka mutu e whakaaro kaupapa kē ana mātou ināianei. E hoe waka ama ana ngā tauira āpōpō, kei te haere ētahi o ngā tuakana ki Ruatōrea āpōpō ki tētahi wānanga pāngarau, koirā te āhua o Waititi,” hei tā Berry-Tumoana

Ā, ko te huhua o ngā kaupapa Māori hei whai anō mā ēnei kaihaka, ko te matua tonu ko te whakataetae-ā-motu, ka tū ki Te Matau a Māui.

Ko tā Morgan, “Ko tā rātou mahi he whakarite, kua tutuki tērā mahi, arā anō tētahi taumata hei eke mā rātou.”

Kua riro anō te mana whakahaere o te whakataetae ahurei Poronīhia mā Ngā Puna o Waiōrea e amo hei te tau e tū mai nei.