Kaupapa: Kapa Haka

Te Whakataetae Kapa Haka ā-Rohe o Aotea - Te Huatahi

Te Kāea
  • Te Tai Hauāuru
Te Huatahi

Nō tō rātou whakarewatanga ake i te tau iwa tekau mā toru, ka taki i te whatārangi a Te Huatahi hei kapa tuatahi mō te rā i ngā whakataetae kapa haka ā-rohe o Aotea.

I taua wā, he huarahi anō hei takahi mā ngā pia e aruaru atu ana i tō rātou arero Māori.

Ā, kua noho mai rā a Te Huatahi hei tino kaitauātoko o te whakataetae nei, ā, e toru noaiho ngā tūnga kua mahue i a rātou nō te tau iwa tekau mā toru.

E rua ngā whakakanohitanga ā-motu tā te kapa nei, ko tōna tuatahi i te tau iwa tekau mā waru i Te Whanganui a Tara, ka mutu, i Ngāruawāhia i te tau rua mano.

Nō tō rātou orokohanga mai, kua koke whakamua rātou ki te hāpai i ngā tāonga tuku iho a ngā tūpuna, tūturu, ko te reo ake o Taranaki me ōna tikanga katoa.

Kua roa nei hoki rātou e taunaki ana i ngā mahi ā-hapori o Taranaki whānui nei, tūturu ake i te raki o te takiwā. Ko ngā pōwhiri mō ngā manuhiri tūārangi, ko te mahi i te Taranaki Arts Festival, tae atu rā ki te taiopenga nui whakaharahara nei, arā, ko WOMAD.

Kei te whakanui rātou i tēnei tō rātou tau rua tekau mā tahi hei rōpū mōtuhake.

Kāti, ko ngā kaitātaki i tēnei rā ko Learra rāua ko Herewini Nopera, ā, anei rā ko tā rātou waiata poi.