Kaupapa: Welfare

Te whakarewanga tuarua mō te kaupapa Family Start

  • Tāmaki Makaurau

Nō te marama o Hongongoi i tērā tau ka tangohia e te Manatū Whakahiato Ora ngā pūtea me te mana whakahaere o te kaupapa Family Start, mai i te marae o Papakura, a Turuki Health, me Te Whānau o Waipareira kei Tāmaki Makaurau, Te Hā o Te Whānau Trust i Ōpōtiki, me Te Roopu Āwhina kei Porirua.

Ko ngā whakapae i tērā wā, kīhai i tutuki ngā mahi i runga i tā te Tari Whakahiato Ora i whakarite ai, heoi te āhua nei kua waihotia aua whakapae ki muri, ā, kua ara ake anō te kaupapa Family Start ki te marae o Papakura, me Turuki Health i raro i te maru o Te Kotahitanga.

Ahakoa ngā tautoko a Te Whānau o Waipareira, kua whai hua anō te kaupapa Family Start ki Māngere me Papakura, e ngau tonu ana te riri a Hone Tamihere, ki ngā mahi poroporo kaupapa a te Manatū Whakahiato Ora.

Heoi mō Te Kotahitanga me ōna nei peka, ona tari tuku ratonga ā-iwi, he rā hei whakanui i tēnei hononga, e whai hua ai ngā whānau me ngā tamariki i raro i te kaupapa o Family Start ki te whitu miriona tāra mō ngā tau e toru kei mua i te aroaro.