Ngā kaupapa: Entertainment, Te Matatini

Te tūnga tuatahi o Kataore ki Te Matatini

  • Waikato/Te Waiariki

E kiia ana, ko te rangi tuatahi te wāhanga uaua rawa atu o te whakataetae, ā, inā te uaua ake ki ngā kapa hōu.  Nō mātou te maringanui ki te piri atu ki te taha o te kapa o Kataore, he rōpū hōu nō te wā kāinga nei, i mua i tā rātou ekenga ki te papa whakatū waewae.

Ko te wāhanga tēnei hei whakatau i ngā anipa, he wā tuatahi tēnei mō Kataore ki te tū ki roto o Te Matatini, ko te mana o Ngāti Pikiao kei runga i a rātou, koinei hoki te tuatahi o ngā rōpū o Te Arawa ki te tū ki runga i te papa whakatū waewae.

Ko tā Piripi Christie, “kua reri mātou kia uru ki mua i te mura o te ahi, i runga i te papa o Rangipare.”

E tau ana te wairua o Kataore i a rātou e whakarite ana ki runga o Otaramarae, engari ko tētahi tirohanga nui ki roto i tēnei rōpū he nui tonu o rātou i noho hei tauira o mua ki te kaiako.

Ko tā te pouako a Ricky Bishop, “tata ki te rua tekau ma rima waku tauira tawhito, te nuinga o rātou kua mutu te kura, kei te whai i te mātauranga kei ngā whare takiura, engari tekau o rātou kei te kura tonu, kei te kura tuarua, ana, koira te ture a te Matatini me tū rua tekau ma rima ngā tauira e haere tonu ana ki te kura tuarua.”

Koinei te wā whakamutunga mō rātou ki te kawe haere i to rātou whakanekeneke, kia tau ai te rere o ngā purerehua.

Inā i muri i te whakatinanatanga o tā rātou puku mahi ki runga i te atamira, ko te mahi tuatahi a Bishop ko te tuku mihi atu ki ngā hoa rangatira, ngā whānau me ngā mātua o nga kaihaka o tana rōpū.

Tāpiri atu ko tāna ano he timatanga noaiho tērā mō Kataore a ko tā rātou mahi i tēnei wā ko te tatari me ēra atu o ngā rōpū mō te whakaingoatanga o te tokoiwa ka whai wāhi ki ngā whiringa whakamutunga.

Kairīpoata:  Mere McLean