Ngā kaupapa: Kapa Haka, Te Matatini

The Te Tau Ihu Kapahaka Regionals.

Tema Hemi
  • Te Waipounamu

I oti te whakataetae kapahaka ā rohe o te tau i te rā nei ki Whakatū. E waru ngā iwi kei roto i te rohe o Te Tau Ihu ā ahakoa e wha noa iho ngā kapa i eke ki te papa whakatu waewae e hīkaka ana ngā kapa me ngā iwi o reira kia eke ki te taumata, hei whakakanohi hoki i Te Tau Ihu ki Te Matatini hei te tau e tū mai nei.

E rere ana te reo rōreka o Kia Ngāwari. Ko te kapa Kia Ngāwari tētahi o ngā kapa tautahito hēoi ka tū mo te wā tuatoru anake hei Te Matatini a tēra tau.

Tokowha noa iho ngā kapa i tū, ko te rohe o Te Tau Ihu te rohe iti o ngā rohe katoa. Ko te kapa Kia Ngawari anake te kapa ka eke ki Te Matatini.

He ai ki te māngai o te rohe a Tom Alesana, he rautaki pai ta rātou ki te whakamaha ake i ngā kapa ka tu ki te atāmira. 

Ko tāna anō, "Ko tā mātou o te kaunihera kapahaka kia āta tiaki kia tautoko i a rātou kia tū anō hei ngā tau e rua e whai mai, anō hoki ki te whakapakari i a tātou tamariki me a mātou rangatahi hoki koina tētahi o ngā tino rautaki o te rohe nei."

Ko tā Alesana he pīki mahi mā te kapa kotahi ki te whakakanohi i ngā iwi e waru o Te Tau Ihu.

Hēoi mo tēnei wa, Ka mīharo katoa a Alesana i ngā kapa katoa i tu i te rā nei me tana kī mai, "He rawe pai te wairua o tēnei rangi mo mātou o te kaunihera o Te Tau Ihu. I kīkī rawa te whare i te minenga. Ae he ahuatanga pai tēna ki a mātou."

Ka timata te kapa Kia Ngāwari i ngā whakangūngū mo ta rātou tū ki Te Matatini. Ka haere rātou me te tino tautoko a te rohe. He wa hīkaka ma Kia Ngāwari me te rohe whānui me ta rātou whakapono ka āhei rātou ki te whakakanohi i te rohe ma te wairua hīhiri me te whakapau i ta rātou katoa mo tēnei kaupapa.

Ko rātou te kapa whakamutunga kia whai turanga ki Te Matatini nōreira kei te mōhio inaianei ngā kapa katoa ko wai ngā kapa ā e tāria te wa kia puta mai ai te rārangi tū a ngā kapa mo Te Matatini hei te wa ka whakamahia e Te Matatini i ngā whakaritenga.