Te Tāke penehīni ā rohe ki Tāmaki Makaurau.

Tema Hemi
  • Tāmaki Makaurau

Kei te rongo ngā iwi o Tāmaki Makaurau i te ngau o ngā utu teitei o te penehīni kua piki ake i te tekau hēneti. I timata te tāke penehīni ā rohe ki Tāmaki Makaurau i tēnei rā.

Nā te kāwanatanga o Reipa me te minita o ngā take waka a Phil Twyford tēnei kaupapa i hora. He ai ki Te Manatū Waka he mahi haumi nui me whakahaerehia hei whakautua i ngā take waka o te rohe. 
Hēoi he ai ki te marea he nui ake ngā utu.

Ko tā te Pāti Nahinara ka whakautua e ngā iwi o Tāmaki Makaurau i te kotahi ira kati rima piriona tāra mo te penehīni.

Ko tā māngai Waka a Jamie-Lee Ross ko ngā whānau whiwhi putea iti ka raru i tēnei tāke, ā  mehemea ko rātou ka tu hei kāwanatanga hei te kōwhiringa pōti hei te rua tau e tūmai nei ka whakakore i tēnei tāke.

Hēoi mo tē hunga noho i konei, auare ake.

I tēnei rā i whai wa ahau ki te haere ki ngā teihana penehīni ki Tāmaki nei ki te kohikohi i ngā whakāro a te marea mo te pikitanga teitei o te penehīni. Anei te kōrero o ētahi,

"Ae kei te riri ahau i te mea ko mātou o Tāmaki Makaurau anake ka raru i tēnei tāke, ki ahau nei ka whakautua kētia mātou mo ngā mea katoa ki Tāmaki nei, hei tāpiri atu i tērā ko te tekau ma tahi hēneti mo ia rīta mo te penehīni inaianei. Kaore he kore he mea whakararu i ahau hei te wa ka whakakī au i tōku waka."

"Ka aroha ahau ki ngā whānau whiwhi pūtea iti i te mea e kore taea e rātou te whakautu i te penehīni inaianei nā te teitei o te utu"

"He uaua ma tētahi pākihi tekehī, i te mea e piki ana te utu he mea uaua māte katoa hēoi inā noa atu ma ngā pākihi tekehi."

"Kaore i te pai te utu penehīni ma te marea. Mo te hunga pōhara mo te hunga whai rawa rānei, ki ahau kaore he rerekētanga. Kei te nonoke haere i ngā wa katoa, kore he parāoa, kore he pata, kei raro te whānau e putu ana."