Kaupapa: Kapa Haka

Te Taitokerau Kapa Haka creates buzz

Taroi Black
  • Te Tai Tokerau

Ka uru atu anō ngā kapa ō Hātea, Muriwhenua me Te Pū Ao ki ngā whakataetae o Te Matatini ki Ngāti Kahungunu a tērā tau. Heoi ko te kitenga nui a te hunga mātakitaki, ko te tū a te kapa hou, Ngā Manu Mātui o Ngāpuhi, me te whakapāe a ētahi, ko rātou tēra i tū toa mai.

He wairua hōu tā rātou i hari mai ki ngā whakataetae haka o Te Taitokerau.

Ko Ngā Manu Mātui o Ngāpuhi te makau, i rāwekeweke rātou i ngā tāonga tuku iho. Ahakoa tā rātou mahuetanga ake i ngā whakataetae o Te Matatini a tēra tau, i riro tonu mā te toa manukura tāne mā Joby Hopa rātou e whakanui. 

Hei tā, Joby Hopa - Hātea, “I pakeke mai rātou i te kura kaupapa, ā, ka eke ki te pakeke. Nō reira he pai te kite i taua āhuatanga. Kua tae mai ko ngā pakeke ki te tū hei kanohi mō Matauri, hei kanohi hoki mā tō tātou waka o Mataatua.”

I kapi katoa a Hātea ki ngā kurupounamu e whitu, me tā rātou kawe hoki i ngā mate huhua. Ko rātou te hunga i karapine atu ki ngā kaupapa tikanga, mātauranga me te hītori.

Ko tā Hopa, “I kite koe i ngā rōpū i tū mai, e noho pouri ana mātou te Whare Tapu o Ngāpuhi i te wehenga o ngā kaumātua maha me ngā tāngata o te atamira, me kī o ngā mahi a Rehia.”

Ko Muriwhenua hoki tēra i rewa ake ki te pae. Mauri tau ana te māpū ki te whakatautau a te kapa mē ō rātou kaupapa hou, kanohi hou hoki.

Ko rātou hoki tēra i hiki ake i te taumata mō ngā kapa puta noa i te hōtaka o te rā.

Hei tā Dan Waitai - Muriwhenua, Kua eke te taumata i roto i te rohe nei, he pai ki ahau nei ki te kite i taua āhuatanga.

Tia Waitai-Henare, Muriwhenua, “Mō ngā marama e ono me kii kei reira mātou e whakapakari tinana ana. Era tūmomo āhuatanga kia ora pai ai tātou kia tū rangatira ai tātou.”

Ko Te Pū Āo tētahi atu kapa i whai tūranga ki Te Matatini. Ko tā rātou poi te tino i tēnei tau.

Ko tā Chey Milne, “Kia tū i runga i te ngākau māhaki kia tū i runga i tēnei mea te Taitokerautanga. Kei konei mātou e patapatai ana, he aha tēnei mea te Taitokerautanga a-kapa haka nei. He tu i runga i te ngākau aroha.”

Heoi ano nā Hātea te karanga o te rā me tā rātou whakakapinga i tā rātou tūtanga hei whakanui i ngā uri o Whangarei.

“Auē kua hāere mātou ki te Matatini anō. Uaua te mahi. Nāreira haramai tētahi āhua. Tā mātou whakapāe me haere ngātahi Te Taitokerau, Ngāpuhi whānui, ngā rōpū e toru. Haere ki te whakaatu i ngā momo o tēnei kainga o Ngāpuhi,” tā Hopa.