Te Reo Kaakaho - Waikato-Tainui's language restoration initiative thriving

  • Waikato/Te Waiariki

Inā te tokomaha o ngā pākeke nō Waikato Tainui e hiki ana i te mānuka ki te ako i tō rātou mita me ō rātou tikanga.  Tōna kotahi rau te hunga tōmina i tae atu ki te wānanga reo tuarua o Te Reo Kaakaho mā ngā uri o Waikato Tainui, i Hopuhopu i ngā rā okioki nei. 

Ahatia rima tekau mā tahi te pakeke o Lil Pompey, e hiki ana ia i te mānuka ki te ako tonu i tōna mita me ngā tikanga.

“Kia pupuri ki tēnei o ngā taonga o ngā tūpuna, me kī tēnei mita o Tainui waka mō ōku nei mokopuna, me aku tamariki hoki.”

E ai ki tetahi o ngā kaihanga o Te Reo Kaakaho a Pānia Papa, “Nā Waikato Tainui tēnei kaupapa, tētehi o ngā kaupapa whakaora reo ki roto i te reo rautaki reo, rautaki tikanga.”

Nō te tīmatanga o te tau i whakamānu ai te rautaki Tikanga Ora Reo Ora, i te taiopenga hākinakina ia rua tau o Waikato Tainui, me tō rātou paetawhiti kia waru tekau ōrau ō rātou uri e matatau ana ki te reo, hei te tau rua mano rima tekau. 

Nā Pānia Papa rāua ko Leon Blake te māhere o Te Reo Kaakaho i waihanga, hei whakaakoranga utu kore mā ngā uri mai i ō rātou marae raupatu ono tekau mā waru, tekau mā ono ngā tau, pakake ake.

Hei tā tetahi kaihanga ano o Te Reo Kaakaho a Leon Blake, “Ko te nuinga hoki kua āhua pakeke ētehi o ēnei, e koa ana te ngākau, nā te mea he mātua ēnei, he kaumātua ēnei, he ruruhi, he koroheke ētehi o ēnei, nā reira e koa ana te ngākau, nā te mea, mā rātou e whāngai atu ki ā rātou tamariki ki a rātou mokopuna.  Nō reira, ka ora te reo i waenga i ngā whānau me ngā kainga, koinei ki au, te wāhi me tīmata.”

Hei tā tetahi o ngā Pouako o Te Kaakaho a Hariru Roa, “I roto i ō tātou taiohi, kei te kite i a rātou e eke ana ki te taumata i te taha reo, ngā whakataetae kapahaka tuarua i te wiki kātahi anō ka hori, nō reira he tohu pai tērā, o te oranga o te reo o roto o Waikato Tainui.”

Me te kōrero ā ngā manu ka tohua pea a Pānia Papa hei waha reo mā te waka o Tainui ki Te Mātāwai.

Hei tā Pania, “Ko te whakaaro o te Kiingi kia tukuna tētehi māngai mō ngā iwi o te whānuitanga o te waka, ki te whakatairanga i te reo, he mea, he kaupapa nui tērā ki tōna ngākau, nō reira, nōna te whakaaro kia tāpaetia tōku ingoa, e kore au e whakahē te kupu a te kiingi.//Kotahi te kupu a te Kiingi, kua mana.”

Hei ngā wiki e heke mai puta ai te whakatau ko wai te māngai mō te waka o Tainui ki Te Mātāwai.