Ngā kaupapa: Crime, Prison

Te Pūrongo motuhake mo ngā pirihimana me Rhys Warren

Mere McLean
  • Waikato/Te Waiariki

He pūrongo motuhake mō ngā mahi a ngā pirihimana i te rerenga kariri ki waenga i a rātou me Rhys Warren i Onepū i te tau rua mano, tekau mā ono. I te marama o Poututerangi e rua tau ki muri, ka tae mai ngā kaiketuketu taru kino ki Onepū. Ko te mutunga iho he riri pū, ā, tokotoru ngā pirihimana i taotū. Hei tā Judge Colin Doherty o te Manatū Whai i te pono “i kite ake te manatū i ngā reanga i hē kē ngā whakatau, ā, kāre i rere pai ki roto i ngā whakahaere”. Kei te tautoko te iwi o konei i ngā kitenga o te rīpoata. Hei tā Warwick Godfrey kaikaunihera o Kawerau “i mutu i runga i te pai, me whakaae tātau ki ngā kitenga o te Manatū, kāre i tika ngā mahi ope taua a ngā pirihimana engari i oti ki runga i te tirohanga ā hāpori”. Nō te Poutu te Rangi, te tau tekau mā ono i rere ai te kariri o Warren ki ngā pirihimana i a rātou e tango ana i ngā tarukino mai tētahi atu whare pātata ki a ia. Ka toro mai te kāhui pirihimana, ā, ka whakarāhui tōna whare. Haurua mai i te toru karaka ka urutomo ngā āpiha i te whare, tokotoru o rātou i whara. Wha tekau mā ono ngā matā i rere ki a Warren mai i ngā pirihimana i a rātou e whakawātea nei i te whare. Hei tā Judge Colin Doherty anō “I te mataku rātou, ā, i whai whakaaro rātou ki a rātou anō, rātou kua whara nei i te wā i uru rātou ki roto o te whare”. Ko tā Kaiwhakawā Doherty i te pūrongo, me whai akoranga ngā āpiha katoa mō ngā mahi whakahaere me ngā kawenga o ia tūranga. “Ko ngā whakatau mai i ngā āpiha, kāre i tika, ā, mehemea i whai i tētahi atu huarahi tērā pea ka ngawari ake”. He tekau tau te roa o te whiunga herehere o Warren, ā, ka kore e whai utu here kia heke rā anō te tekau tau.