Te Puea Marae open their doors to the homeless

  • Tāmaki Makaurau

He marae i te tonga o Tāmaki Makauraui e whakapuare ana i ōna tatau ki ngā whānau kore kāinga, he kino nō ngā utu whare i te rohe. Hei tā Hurimoana Dennis nō Te Pua Marae i Māngere, e wātea ana tō rātou marae ki te katoa, ahakoa te tae o te kiri.

E whai ana te marae o Te Puea i ngā tikanga a tō rātou tūpuna

E ai ki te Māngai o Te Puea Marae a Hurimoana Dennis, “Kia mātou te whānau Te Puea, he whai ake te whakaaro rangatira o tō tātou nei whāea Te Puea Herangi. Tōna tino mahi, hei manaaki atu ki ngā tangata, ahakoa nō hea.”

Kua tokomaha te hunga e noho whare kore ana i Tāmaki Makaurau, me te kōrero mō ngā mea e noho ana ki roto i ngā motuka, i te pokapū o Tāmaki.  Kua roa nei te wā te marae o Te Puea e manaaki ana i tō rātou hapori.

“They know that this place is available to them. But people from the Pacific, Asians, we'll look after them. But first our Māori families,” hei tā Dennis.

Whēnei i Te Pūea, e tuwhera ana ngā kuaha o ngētahi atu marae i Tāmaki. Kotahi te whānau i noho ki Te Mahurehure i Pt Chev mō te kotahi wiki, he koha noa te utu. Ā kua kōrero a Te Tira Hou ka tuwhera ō rātou kuaha, ahakoa ko wai, ahakoa no whea te tangata.

E ai ki te mema paremata o Tāmaki Makaurau a Peeni Heare, “Me whakatutuki tātou i ngā kōrero i te wā i hangahanga ai e tātou i ēnei marae.  Ko te kaupapa o te marae, ko te tiaki tangata, ko te manaaki manuhiri, ko te kawe kaupapa.”

Ka utua e te tari o Te Hiranga Tangata te nama ki ngā mōtēra, kia kotahi wiki te roa, mō ngā whānau e noho kainga kore ana.

Hei tā Henare, “Ko te hiahia kia tuwhera mai ngā kuaha, ko te putea ā te kāwanatanga hei utu i ngā nama, ara, ko te hiko, ara ko te wai. Engari ko te mea nui ka tono atu ki te kāwanatanga kia toro mai ōna ringa o ngā tari kāwanatanga ki te kaupapa nei.”

Kia hāngai ki ngā kupu a Te Puea, ara, Mahia te mahi, hei painga moo te iwi".