Ngā kaupapa: Kapa Haka, Te Ihu - Day 1, Te Matatini

Te Matatini 2015 - Te Waka Huia

Te Kāea
  • Tāmaki Makaurau

E rima ngā taitara toa ā motu kua riro i a rātau, ā, ko Te Waka Huia te take i poha katoa ai te papa o Pūtaringamotu e te tangata i tā rātau whakaeketanga atu ki runga i te atamira o Te Matatini 2015. 

Nā Tākuta Ngāpo Wehi te ingoa o Te Waka Huia i tapa ki runga i te tira, he taonga kāmehameha. I whakatauritehia e Ngapo āna kaihaka ki te taonga kāmehameha nei. 

I waihangahia mai a Waka Huia hei rōpū whānau i te wā i hūnuku a Ngāpo rāua ko Pīmia Wehi i Waihirere, Tūranga ki Tāmaki Makaurau.

I te tau 1986, i whai wāhi atu rātau ki ngā pukapuka hītori, inā rā, ko rātau te kapa tuatahi rawa i kapo ake i te taitara toa ā motu i tā rātau whakarewanga. Koia hoki te whakataetae i tū ki konei tonu, ki Otautahi. 

Ko ngā kaiako, n`ga kaitātaki hoki o tēnei rōpū nō Tāmaki Makaurau, ko Tāpeta rāua ko Annette Wehi.

I Te Matatini i te tau 2013 ki Rotorua, i riro i a rātau te taonga Duncan McIntyre, ā, i whakahokia mai e rātau taua taonga ki Pūtaringamotu inanahi nei. 

Anei tētahi wāhanga o tā rātau tū i te whakataetae ā motu o Tāmaki Makaurau i tērā tau:

Anei tā rātau whakawātea, ko Te Tatangi o te Whare Karioi.