Ngā kaupapa: Boxing, Education

Te kotahitanga mai o ngā kēnge te tīnanatanga o te moemoeā o rātou mā

Dean Nathan
  • Te Tai Tokerau

Ko te kotahitanga mai o ngā kēnge te tīnanatanga o te moemoeā o rātou mā.

Koinei tā ngā mātua ki te hapori o Ōtangarei mai rā anō he kāinga tūwatawata nō te rōpū Mangu Kaha.  Kua pau katoa ngā tīkiti te hoko mō te hui whawhai a ngā kēnge o te motu hei whakamutu atu i ngā kōhuru me ngā pupuhitanga ki ngā tiriti.

Ki tā te kaikaranga ki Ōtangarei Marae a Hira Kopa, "He mea aroha ake au ki a rātou i te mea ka hoki anō koe ki te whakapapa ka mōhio koe te tata o rātou te toto ki te toto.  He moemoeā tēnei nō o mātou matua tūpuna o konei kia kotahingia rātou.  Kua tīmata te moemoeā o rātou."

Ki ngā matapae a te tari pirihimana, neke atu i te whā rau ngā mema kēnge kua tae mai ki Whangarei mō ēnei rā okioki.

Ko tā te kaiwhakahere-ā-rohe a Justin Rogers, e aronui ana mātou ki te haumarutanga o te hapori.

Hei tēnei ahiahi rā anō tīmata ai ngā whawhai mekemeke rua tekau katoa i runga anō i te karanga a ngā kaiārahi o ngā kēnge kia whakamutu atu te riri kua pātere ki ngā tiriti i te tau kua pahure, ā, kia mau ai taua riri ki te rīngi mekemeke.

E mea ana a Hira Kopa, "Ki te hinga tētahi o rātou i roto o hea atu wāhi, ka hoki mai ki konei māku e pōwhiri ki runga i te marae.  Ko te tūmanako kia mutu tō rātou whawhai i a rātou, kaua e whakamate i a rātou kia aroha tētahi ki tētahi, kia tau te rangimaria i waenganui i a rātou."

Heoi anō, he kōrero anō tā ngā pirihimana.  Hei tā Justin Rogers, he painga tonu tēnei engari e mōhiotia whānuitia ana ngā hara pēnei i ngā kōhurutanga o i ngā rangi tata nei, me ngā mahi hoko taru kino, he mahi a ngā kēnge.