Te huritau 150 o Te Pakanga o Rangiriri

  • Waikato/Te Waiariki

I Rangiriri te iringa mai o ngā kapua i te rā nei, i te whakaekenga mai o te manuhiri ki te pā tūwatawata o Rangiriri.

E kī ana e kore rā e warewaretia te pakanga o Rangiriri, i tū nei ki ēnei whenua, ka mutu, puta mai ana ko ngā uri whakaheke o aua tupuna whakahī rā, ki te whakamahara ake i o rātou tupuna ake.

I whānau ake te Kīngitanga, hei whakatōpū i ngā iwi, mō te mana motuhake ki ngā whenua te take.

Ko ngā kupu o roto i tēnei Haka Pōkeka, i hakaina mai e Waikato-Tainui rātou ko ngā Ope Taua e whai pānga ana ki te Kīngitanga, e mea ana he whanako, he raupatu, he kōhuru, he pāwhera a ture te mahi a te Karauna he kotahi rau rima tekau tau ki muri.

I takinga ake te karakia o te ata ki ngā pouwhenua nei, he mea tohu i ngā tūpuna i a Te Wharepū raua ko Tīoriori, ā, i whakatūria ake i te rā nei anō hoki.

Ahakoa kua tata hipa ake te rua tekau tau, mai anō i te Whakataunga Raupatu a Waikato-Tainui, he rā hoki tēnei, kia whakamoea te patu, kia anga whakamua te iwi katoa.