Kaupapa: Education

Te huritau 100 o Te Kura o Matapihi

Mere McLean
  • Waikato/Te Waiariki

I whakanuia te kotahi rau tau o Te Kura o Matapihi ki Tauranga i ngā rā kua hori.

Kua kotahi rau tau te mātauranga e whakatairangitia ana ki roto i ngā whānau o Matapihi ki Tauranga moana, ā, ko te manako ia ka kotahi rau tau anō tēnei taonga māpihi e taurima ana i te hapori.

Hei tā te tumuaki o te kura, tā Tui Rollenstone, "e kaha ana te hapori, ngā kuia, ngā kaumātua ki te tautoko i a mātou, mātou ngā kaiako, he kaha hoki ngā kaiako ki te tautoko i ngā tamariki, nā te mea ko rātou hoki ngā whānau o Tauranga Moana."

I tūwhera ngā tatau o Te Kura o Matapihi i te tau kotahi mano, iwa rau, tekau mā toru i raro i te karangatanga o te 'Native School'. 

I tēnei rā, kua kura reo rua te Kura o Matapihi mā ngā tau kotahi ki te waru. 

Ka noho te tatau o ngā tamariki ki waenga i te rima tekau ki te ono tekau.

Tā Leone Walker (Ngāti Ranginui, Ngāi Te Rangi), "ko te kura te manawarū o te hapori, i a ia ka ahu mai ko te reo o te kura, te reo o te tumuaki, ngā mahi a te poari kaitiaki me te whānau."

Ko te tūmanako ka tuhia he pukapuka whakamaumahara, ko ngā kōrero o roto ka ahu mai i ngā tauira ō-mua, ngā kaumatua me ngā kaiako.

I te pūrongo whakamutunga a te Tari Arotake Mātauranga, i rere ngā whakamiha ki te kura me to rātou āki kia haere tonu o rātou mahi hiki i te mātauranga a te Māori.