Kaupapa: Tainui

Te Huinga Waka o Tainui

  • Waikato/Te Waiariki

Kaua e rangiruatia te hāpai o te hoe, e kore tō tātou waka e ū ki uta. Koira ngā whakaaro o ngā uri o Tainui waka i hui ki te marae o Turangawaewae i te rā nei, mō te huinga waka rua mano tekau ma wha.

Hei tā Paraone Gloyne, “Kaare i homai he putea ki ngā rā maharatanga i ngā riri whenua ki roto i a Tainui, Waikato, maniapoto, hurinui i te motu pau ke te kaha ki te whakanui i ngā rā o Anzac”

A koinei ngā painga o te huihuinga a iwi, ko te whakakotahi o ngā whakaaro a te marea, kia kore ai te hāere o te waka e titaha.

A ko Hoturoa Kerr tētahi hei kaiurungi i ngā mahi waka i ngā tau kua pahure ake nei, a pera ki tona tupuna a Hoturoa, he wawata nui tāna mō ngā uri whakaheke.

Katahi ngā rangatahi ngā taiohi o Tainui ka mohio ki ngā kōrero, o a rātou waka tupuna me ngā waahi tawhito i noho ai o rātou tupuna. Na ka pupu ake te hiahia me te whakaaro nui me te aroha ki to rātou waka ki to rātou iwi.

E ai ki Kerr, ahakoa te mano tangata i tae mai i te ra nei, i a rātou e hoki atu ki te kainga, me kaua rātou e wareware ki o rātou tikanga.

Ko te whakatō te whakaaro ki roto i o tātou rangatahi, he uri rātou o te waka o Tainui.

Kaare e kore, no ngā mahi i tēnei rā, ka puawai ngā uri nei o Tainui waka hei ngā tau e tu mai nei.