Ngā kaupapa: Kapa Haka, Te Arawa, Rugby

Te haka apiapi i riro āhua toanga ki Rotorua

  • Waikato/Te Waiariki

Kua mau a Aotearoa i te āhua o te toanga mō te mahi haka. Neke atu i te whitu mano tāngata i tū ki te tuku i te haka Ka Mate i Rotorua i te rangi nei.

I pūkanana mai ngā whatu tāngata, i ngūnguru ai te whenua i te whakatūtū mau āhua toa i Rotorua.

I karahuihui ai te tini me te mano kia tuku i te haka apiapi i tākina e Wetini-Mitai Ngātai rāua ko Eraia Kiel.

Ko tā Eraia Keil, Te Arawa, "Ka huihui mai te tini me te mano ki konei i runga i ngā papa whenua tapu o whakaue kaipapa e ki ana ko kouranga whitiwhiti tenei wahi i runga noa i te karanga a tane rore ki te whakatutuki i tenei ahuatanga o te haka."

I kaha kitea ngā āhuatanga whakahoahoa i waenga i ngā taha e rua i mua ake i te tukinga Raiona ki te kapa Māori. I tū ngā mata rau o Piritana Nui, o Airihi hoki kia kawea te haka.

E ai ki a Wetini Mitai-Ngatai, Te Arawa, "Whānau kotahi me ki tātou katoa i tēnei rangi. Me kuhu mai rātou ki te āwhina, ki te tautoko i tēnei kaupapa, whakarangatira rātou hoki, whakarangatira i te rā, whakarangatira hoki i te taenga mai o ngā Raiona nei ki waenganui i a tātou."

I hāparangi ake te whakaminenga ki te rongo atu i te tokomaha i tae atu, i tata paparua ake te tatauranga i tērā o ngā kaipupuri o mua, o Wiwi.

Ko tā tētahi o ngā kaihaka o te kapa Raukura, a Te Ao Leach, "He tino miharo ki tōku nei whakaaro ki te kite i ngā tāngata katoa kua huihui mai ki konei kia mahi tahi kia tū tira mai me kī. Ae, tino miharo."

"He rawe pēnei i te wini i tētahi kēmu whutupōro. He pai te toa i te record nei nō reira ae, he rawe." - Te Okiwa Morgan.

Kua tukuna ngā kaiwhakahaere i ngā taunakitanga ki a Guiness World Records, ā, e tatari ana rātou kia whai whakatūtūrutanga.