Ngā kaupapa: Environment, Rena, Water

Te āhua nei ka noho pea te kaipuke Rena ki tōna tauranga

Mere McLean
  • Waikato/Te Waiariki

Te āhua nei, ka kotahi tau anō te tawhiti o tētahi whakatau ki ngā iwi o Tauranga mō te unuhanga ake o te kaipuke Rena i tō rātou moana.

I te whakawākanga kōhukihuki a te Rōpū Whakamana i te Tiriti o Waitangi ki Tauranga mō tēnei take, ka puta hoki ko te riri o ngā iwi o Motiti i te korenga o rātou kia whai reo ki te tēpu whiriwhiri me te rongotanga atu ki ngā mahi huna a te Kāwanatanga me te kamupene nō rātou te kaipuke.

Kei te hiahia ngā iwi o Tauranga i tētahi whakatau mō te Rena inaia tonu nei, nā te mea mō rātou e noho ana ki runga i te moutere o Motiti he mōrearea ā-oranga tēnei.

Hei tā Kereama Hoete, “Ināianei kua rerekē te āhuatanga i Motiti, he torutoru mātou i reira, ko au te kaumātua, he torutoru mātou ki te manaaki, ki te awhina i ngā āhuatanga o te moutere.”

I te mārama ka huri i tono atu te kamupene nō rātou te Rena kia waiho te kaipuke ki runga i te tau o Ōtāiti.

Mō rātou o te poari rohe moana o Motiti he whakatau tēnei kua pēhi kino i te oranga o tō rātou hapori.

Kāre e mōhiotia ana āhea rawa ka puta ngā whakatau a te rōpū whakamana.  Heoi mō te taha ki te tono a te Ture Rawa Taiao, ka kati ngā tono hei te tuawaru o Hereturikōkā.