Taurua opposes date for New Zealand Wars commemorations

Heeni Brown
  • Te Tai Tokerau
  • Tāmaki Makaurau
  • Te Whanganui-ā-Tara

E whakahē ana a Kingi Taurua i te rangi kua whakaritea hei rā whakamahara i ngā riri whenua o Aotearoa. E tae mai ana tēnei i te whakatau a te kawanatanga he tohu i Te Rā Maumahara ki te rangi tonu o Te Whakaputanga.

Horekau a Kingi Taurua e tau ana ki te whakaaro, kia tū Te Rā Maumahara ki te rā i mokongia ai Te Whakaputanga.

"Ahakoa pēhea e kore mātou e whakaae ki tērā kaupapa, kua kōrero ahau ki ētahi o aku kaumātua kahore rātou e whakaae ana i te rā, kua mea mai rātou kia kōrerohia tēnei take. Ka mau tonu mātou ki tērā rā, he rā mō te mokotanga o te whakaputanga o ngā hapū. Mehemea he kōrero mō tēnei kaupapa ka āta noho ki te kōrero, engari mō te rā e whakaritea ai, e hiahiatia ai e te katoa. Engari kahore te rā, rua tekau mā waru o Oketopa e whakaaetia."

Tā Te Pāti Māori i hui tahi ai ngā iwi o te motu, nā rātou tonu i whakatau Te Rā Maumahara i te koni i te rua rau rima mano i riro ki ngā pakanga a te Māori ki te Karauna o ngā tau kotahi mano waru rau.

Hei tā te Minita Whanaketanga Māori a Te Ururoa Flavell, "I riro mā ngā iwi tērā take e wetewete e wānanga, kua tū ngā hui e rua ki taku mōhio, ā, kua puta te whakatau koinei te rā pai hei rā maumaharatanga ki ngā pakanga nui i tū ki te wā kainga. Nō reira kāore he huarahi i kō atu o tērā, kia waiho ake mā ngā iwi tērā e whakatau, kua tutuki pai te kaupapa."

Engari horekau i whakapā atu ki a Kingi Taurua mā o Te Whakaminenga, e meatia ana, ko rātou ngā kaitiaki o Te Whakaputanga.

Hei tā Taurua, "Ko ahau tērā te kaikōrero, te mana whakahaere ki te whaikōrero mō tērā kaupapa, nā kahore rātou i haramai te kite i a ahau, kahore rātou te kōrero ki a ahau. Engari ko ahau e mea ana kaua te kawanatanga e wero mai ō rātou ihu i roto i tēnei kaupapa. Waiho mātou, tātou kia tū mataara anō i roto i ō tātou nei take, ā tātou nei tino rangatiratanga, tēnei rā"

Tā Te Minita Whanaketanga Māori kua whakatahangia te kotahi miriona tāra hei pūtea tautoko.

Tā Peeni Henare o Reipā kua rite mai Te Taitokerau ki te whakahaere i Te Rā Maumahara tuatahi.

"Ko te Oketopa e tū mai nei ka riro ki a mātou te tekau mā rua marama ki te whakaritea tētahi hui. Kāore e kore, ka tū mātou o Te Taitokerau mō te take nei."

A tērā Oketopa, te rua tekau mā waru, kua whakaritea mā Te Taitokerau Te Rā Maumahara tuatahi e whakahaere.